УИХ-ын гишүүн Б.Энхбаяр өнөөдөр "ШШГЕГ-ын харьяа Төр хурах амралтад сэйфэндээ 7.6 тэрбумыг хадгалж байсан С.Батдөл гэгч амралтын байдалтай хоригдож, архи дарс ууж наргиж цэнгэж байдаг юм байна. Энэ хүнийг хамгаалдаг хүн бол манай улсын мөнгө санхүүг хариуцаж байгаа сайд. Нэг нутгийн энэ хоёр хүнд ямар холбоо сүлбээ байна вэ. Яагаад ШШГЕГ-ын төсөв санхүү гэнэтхэн нэмэгдэв гэдгийг судлах ёстой" хэмээн байр сууриа илэрхийлсэн.
Тэгвэл ШШГЕГ-ын санхүүг нэмж, нутгийн дүүгээ эрхлүүлж буй гэх хүн нь Сангийн сайд Б.Жавхлан гэх мэдээлэл гарсан даруйд Б.Жавхлан сайд “Надад ямар ч хамааралгүй. Дарханых гэдэг ч би уулзаж байгаагүй. Аав ээж нь манай намын гишүүд учраас хүүгээ надад захиж байсан тохиолдол бий. Гэхдээ тэрний төлөө надад хамаатуулж болохгүй биз дээ. Б.Энхбаяр гишүүн хувийн өс хонзонгоор над руу дайраад байгаа. Би ганц үг хэлчихье. Амжихгүй шүү” хэмээн бухимдав. Тэгвэл энэ асуудалд ШШГЕГ-ын дарга, хурандаа Б.Нандинболор “Төр хурах манай байгууллагын мэдэлд байсан сувиллын газар.
Тэнд аж ахуйн тооцоот үйлчилгээний газар гэдэг утгаараа ахмадууд болон манай байгууллагын хүмүүс очиж амардаг учраас улирлын чанартай галч ажилладаг. Дөрвөн хоригдол харуул хамгаалалтын ажил гүйцэтгэх буюу галчаар ажиллаж байсны нэг нь С.Батдөл юм билээ. Сар гаруй ажиллаад буцаад одоо 409 дүгээр хорих ангидаа хоригдож байгаа. Бусдад гэм хор учруулсан бол гэм хорын хохирлыг барагдуулах үүднээс ажлын байраар хангаж, цалин олгодог. Тэр дагуу хуулийн хүрээнд ажил хийсэн асуудал бий.
Бидний төсөв 80 гаруй хувиар багассан. Оны өмнөхөн Шүүх байгуулах тухай хууль хэрэгжиж эхэлсэнтэй холбогдуулан дагаж мөрдөх журмын тухай хуулиар эрэн сурвалжлах нэгжтэй байна гэж заагаад, орон тоо нэмэгдсэн асуудал бий. Төсөв батлагдах асуудлыг Хуульзүй, дотоод хэргийн сайд л авч ордог. Бид уулзах асуудал байхгүй. Санхүүгийн хэлтэс рүү өгөөд цаашаа салбар яам аваад УИХ руу ордог. Д.Цогтбаатар гишүүний тухай асуудал албажиж ирээгүй. Шүүхийн байгууллагад ирвэл бид ялыг нь хэрэгжүүлэх чиглэлээр ажиллана. Хорихоос өөр төрлийн ял эдлүүлэх алба руу би өдөр болгон тодруулж байгаа ч бичиг ирээгүй” гэлээ.