“Гацуурт” ХХК-ийн Ерөнхий захирал Л.Чинбат ХХААЯ-наас махны үхрийн чиглэлээр аж ахуй эрхэлнэ гэж гурван тэрбум төгрөг төрөөс зээлсэн мэдээлэл байгаа билээ. Энэхүү мэдээллийг ХХАА-н сайд асан Р.Бурмаа олон нийтэд дэлгэж, өрөө төлөхийг сануулж, дараагийн аж ахуйн нэгжид боломж олгох ёстой хэмээн цахим хуудсаараа мэдэгдэж байсан юм. Энэ талаар ХХАА-н сайд асан Р.Бурмаатай холбогдож “Таван үг” солилоо.

-Сайн байна уу, сайхан хаваржиж байна уу. Та “Гацуурт” ХХК-ийн Ерөнхий захирал Л.Чин­батыг төрөөс зээлсэн гурван тэрбум төгрөгөө төлөхийг сануулж байсан. Энэ хэзээ авсан зээл юм бэ. Хэн энэ зээлийг түүнд олгосон юм бэ?

-ХААХҮ-ийн сайд асан Т.Бадамжунайгийн үед төрөөс гурван тэрбум төгрөг зээлсэн байдаг. Л.Чинбат махны үхрийн чиглэлээр аж ахуй эрхэлнэ гэж тендерт шалгарч авсан байдаг. Намайг сайдын ажлаа өгөх хүртэл гурван тэрбум төгрөгөө төлөөгүй.

-Төлөхгүй байгаа шалтгаан нь юу юм бэ?

-Намайг ажил авах үед зээлийнх нь төлөх хугацаа хэтэрчихсэн байсан. Хугацаа хэтэрсэн төлбөрийг төлөөч гэдэг шаардлага нэ­­лээд тавьсан. Яаманд ирж уулз гэж хэлээд ч ирээ­гүй. Махны үхрээсээ өг гэж гэсэн ч нэмэр бо­лоогүй. Найз нөхөддөө өг­сөнөө төрд өгөх мөн­гөө төлсөн гэж үздэг юм билээ.

-Т.Бадамжунай сайд Л.Чин­­батад гурван тэр­бу­мын зээл өгөхдөө гэрээ хий­сэн биз дээ?

-Гэрээ хийсэн. Би гэрээнийх нь дагуу мөнгөө нэхэмжилсэн юм. Энэ асуудалд Т.Бадамжунай сайдыг буруутгах арга байхгүй. Түүнд гурван тэрбум төгрөгийг бэлэглээгүй, гэрээ хийгээд үйл ажиллагааг нь дэмжсэн байгаа юм. Иймээс зээл авсан байгууллага нь хариуцлагатайгаар төрд тө­лөх ёстой өр төлбөрөө барагдуу­лах нь шударга ёсонд нийцнэ. Гэрээгээ биелүүлэх ёстой.

-Найз нартаа мөнгө өгсөнөө Л.Чинбат зээлээ төлсөн гэж хэлээд байгаа гэлээ. Найз нар нь гэж хэнийг хэлээд бай­на вэ?

-Монголын үр тариа эрхлэгч­дийн газар тариалангийн хол­бооны Ерөнхийлөгч, “Шим” груп­­­­пын захирал Л.Цандэлэг бо­­лон “Анх тамир” ХХК-ийн за­хи­рал Ш.Норовсамбуу нарт өг­сө­­нөө хэлдэг юм шиг байгаа юм.

-Зээлээ төлөхгүй яваад бай­вал ямар хариуцлага тоо­цох вэ?

-Зээлээ нэн тэргүүнд төлж ба­рагдуулах ёстой. Л.Чинбат мун­даг учраас улсаас гурван тэр­­бум төг­рөг зээлээгүй юм. Гур­ван тэр­бум төгрөгөөр сайн үүлдрийн мах­ны үхэр оруулж ирнэ гэсэн болохоор дэмжиж өгсөн юм. Хэр­вээ Л.Чинбат зээлээ хуга­цаанд нь төлөөд явсан бол олон хүн энэ төрлийн аж ахуйг эрх­лэх боломжтой бол­но.

-Хууль хяналтын байгуул­лага энэ асуудалд хяналт тавь­даггүй юм уу?

-Хөдөлмөрийн баатар хүн тө­рийг ингэж хохироож болох­гүй. Энэ асуудалд салбарын сайд нь одоо анхаарах ёстой.