Замын цагдаагийн ерөнхий газрын Урьдчилан сэргийлэх хэлтсийн дарга, хурандаа Э.Бөхбат баяр наадмын үеэр хурдаа тохируулж замын хөдөлгөөнд оролцохыг сануулж, мэдээлэл өглөө.
Тэрбээр, “Үргэлжлэн орсон их борооны улмаас зам даваа маш их хальтиргаатай байна. Бид “Өмнөхөөсөө суралцаж ирээдүйгээ бий болгоё” гэсэн уриа дэвшүүлсэн. Өөрөөр хэлбэл, өмнөх алдаанаасаа суралцаж ирээдүйгээ бий болгоё гэж уриалсан хэрэг.
Гэвч өмнөх жилүүд шиг л зам тээврийн осол гарсаар байна. Гүйцэж түрүүлэх үйлдлийг буруу хийдэг, согтууруулах ундааны зүйл хэрэглэсэн үедээ машин жолооддог, хальтиргаатай замд хурдаа тохируулаагүй зэрэг осол нэгхэн өдрийн дотор олон бүртгэгдлээ. Жолооч нар айраг их уудаг. Гэвч энэ нь өөрөө согтууруулах ундааны зүйл шүү дээ. Бусдын амь насыг хариуцаж яваа учраас замын хөдөлгөөнд соёлтой оролцмоор байна гэж уриалъя. Амьд явбал ирэх жилийн наадам үзнэ гэдэг шүү дээ” гэв.