Ирэх долоо хоногт буюу аравдугаар сарын 01-ний өдрөөс ажиллаж эхлэх шахмал түлшний борлуулалтын цэгүүд цаг агаар хүйтэрч байгаатай холбоотой өнөөдрөөс эхлэн дүүрэг бүрт ажиллаж эхэллээ. Эхний ээлжинд доорх зурагт үзүүлсэн 40 цэг ажиллана. Харин аравдугаар сарын 01-ний өдрөөс 600 цэг ажиллана. Иргэд та бүхэн эдгээр 40 цэгээс шахмал түлшээ худалдан аваарай.
Түлшний борлуулалт эхэлж байгаатай холбогдуулан нийслэлийн гэр хорооллын бүсэд амьдарч байгаа айл өрхүүдийг түлш худалдан авах эрхийн “Сайн” картаа баталгаажуулж, өрхийн бүртгэлдээ бүртгүүлэхийг уриаллаа.
Учир нь, Засгийн газраас 2021-2022 оны галлагааны улиралд “Нэг өрх- нэг карт” зарчмыг баримталж, сайжруулсан түлшний борлуулалтыг хийхийг Тавантолгой түлш ХХК-нд үүрэг болгосон юм. Тиймээс айл өрхүүд гэртээ байгаа картаа өрхийнхөө бүртгэлд бүртгүүлж, баталгаажуулах шаардлагатай. Хэрэв бүртгэлгүй карттай бол танд түлш олгохгүй гэдгийг ч албаныхан хэлж байна.
Тиймээс Тавантолгой түлш ХХК-ийн 7011-9400 дугаарын утсанд хандаж харьяа дүүргийнхээ ХҮТ-ийн салбарын хаяг байршлийн мэдээллийг авч картаа баталгаажуулах юм. Шинээр карт авах бол 10 дугаар сарын 1-ээс эхлэн олгож эхлэх аж.
