Ерөнхийлөгч ажлаа авсан да­руйдаа ард иргэдтэйгээ уул­заж, 21 аймаг, есөн дүүр­гээр уулзалт хийж яв­на. Ерөнхийлөгчийн хийх ажлын нэг нь иргэдтэйгээ уулзах, ир­гэ­дийн­хээ хүсэл сонирхлыг төрийн бод­логын төвшинд хүргэх, төрийн бод­лого, шийдвэрийг иргэддээ ойлгуулах гэж миний хувьд ойлгодог байлаа. Гэтэл буруу ойлгодог байжээ. Учир нь, саяхан Увс аймагт очиход нь Ю.Цэдэнбал дар­гын хөшөөнд цэцэг өргөсөнгүй гэж хэдэн нөхөр нийгмийн сүлжээнд баахан “бааллаа”.

Нээрээ тэдний зөв юм болов уу. Юмыг яаж мэдэх вэ. Манай Үндсэн хуульд Ерөнхийлөгч иргэдтэйгээ уул­захаас урьтаад хөшөөнд цэцэг өргөнө гэ­дэг заалт байдаг ч юм билүү, хэн мэдлээ. Тэгвэл Дорнодод очихдоо иргэдтэйгээ уулзахаас урьтаад Х.Чойбалсангийн хө­шөөнд цэцэг өргөх ёстой байж. За тэ­гээд Хөвсгөлд Чингүнжавын хөшөөнд, Өвөр­хангайд Т.Намнансүрэнгийн хөшөөнд гэх мэтээр зөвхөн цэцэг өргөх гэж явах ёс­той. Нэгэнт “эцэг өвгөд”-өө хүндлэх ёс­той юм чинь Баянхонгор аймагт бай­даг динозаврын хөшөөнд ч цэцэг өр­гөхөд буруудахгүй.

Хүй нэгдлээс өмнө хор­воо дэлхийд байсан нь үнэн юм чинь хүндлэхэд гэмгүй. Цаашлаад сум орвол, сум бүрт бий морь, хонь, тэмээ, ямаа, үхэр, тахиа, нохой, гахай, шувуу, трактор, комбайны хөшөөнд цэцэг өргөх шаардлагатай. Бусад аймгийнхан ч Ерөнхийлөгчийг очиход манай аймгийн энэ хөшөөнд цэцэг өргөсөнгүй гэж шүүмжилдэггүй ямар дүүрчихсэн нөхөд вэ, ер нь. Харин манай увсынхан яах аргагүй зөв санал дэвшүүлсэн байна. Бүхэл бүтэн Увсаас төрсөн, төр барьж байсан хүний хөшөө ханхайгаад байж байхад цэцэг өргөчихдөггүй, яачихсан Ерөнхийлөгч байсан юм. Яаж ч бодсон өмнө нь төр барьж байсан хүнээ хүндэтгэх хэрэгтэй шүү дээ. За тэр ч яах вэ. Өөр зүйл рүү халихад Ю.Цэдэнбал дарга маань төр барьж байхдаа Чингис хааныхаа хөшөөнд цэцэг өргөж байсан байлгүй дээ, бодвол.