Цахим орчинд нийгэм, цаг үеийн асуудлаар меме хийж түгээдэг ноорог.мн сайтын залуусыг өнгөрсөн шөнө Цагдаагийн ерөнхий газрын Кибер гэмт хэрэгтэй тэмцэх хэлтсээс шалгаж, нэр бүхий найман ажилтныг саатуулан эд хөрөнгийг нь хурааж, мэдээлэл авах нэрийдлээр үүрийн зургаан цаг хүртэл саатуулж шалгасан гэх асуудлаар тус сайтын залуус болон өмгөөлөгч нар нь мэдээлэл хийлээ.
Тодруулбал, эдгээр залуусыг MCS компаниас санхүүжилт авч, сошиал орчинд тролл баг ажиллуулж байсан гэх үндэслэлээр шалгаж, хард, утас зэргийг нь хураан авчээ. Тэгвэл ноорог.мн сайтыг үүсгэн байгуулагч О.Уламсайхан “Хойшлуулашгүй ажиллагаа гэдэг үгтэй шинээр танилцлаа. Тухайн сэжигтэн нотлох баримтаа устгах гэж байгаа, гадаад руу оргон зайлах гэж байгаа этгээдүүдэд ашигладаг юм билээ. Гэтэл бид бол цэргийн баяраа тэмдэглээд ажил дээрээ тоглоом тоглоод сууж байсан. Гэтэл Кибер гэмт хэрэгтэй тэмцэх хэлтсээс ирээд утас холбоо барих хэрэгслийг хураан авч, шууд байрандаа авчирсан. Бид өмгөөлөгчтэйгөө холбогдох хүсэлт гаргасан ч “Очоод холбогд” гэсэн ч утсыг маань өгөөгүй. Хамгийн сүүлийн хүмүүс маань үүрийн 06.30 цагт гарч ирсэн. Тэр хугацаанд Үндэсний аюулгүй байдлын эсрэг гэмт хэрэг гэсэн зүйл ангиар баривчлах хүсэлт прокурор руу илгээгээд тэр хугацаанд бид өмгөөлөгчтэйгөө ч холбогдож чадахгүй хүлээсэн. Энэ газар би өмнө нь ирж байсан. Арванхоёрдугаар сарын 31-ний өдөр ирсэн. Үндэслэлээ огт хэлдэггүй. Тэр киноны эвлүүлэг дуусаагүй байгаа.
Хууль бусаар бичиж авсан дэлгэрэнгүй дүрс ч байхгүй. Гэхдээ сонгууль ямар хэмжээнд шударга бус явдаг юм бэ гэдгийг харуулсан. Гомдол гаргагчийг хэлэхдээ цахим орчинд хуурамч хаяг ашигладаг хүн “Тухайн залуусын хийсэн киноноос болж хүн амиа хорлох гээд байна” гэж гомдол гаргасан гэж ахлах мөрдөн байцаагч нь хэлсэн. Монголд байгаа бүх медиа агентлагууд том групп компаниудтай гэрээ байгуулж, хамтарч ажилладаг. Ажиллаж байсан гэдэг нь бид бизнес хамтрал хийж байсан гэсэн үг.
Боломжгүй юмыг хийгээд явуулж байна гэдэг нь айлгах гэсэн зүйл. Бид хэн нэгний нэр хүндэд санаатай халдаагүй. Бид худлаа зүйл ярихгүй. Зургаан өөр бүсэд зургаан хүнийг л дагаж ажилласан. Энгийн иргэнийг дагаж ажилласан гэсэн үг. Монголд сонгууль яаж явдаг юм бэ гэдгийг л харуулахыг хүссэн. Манай оффисоос юу юу хураасан нь мэдэгдэхгүй байна. Бидний гар утсыг хурааж авсан. Заримд нь өмгөөлөгчгүйгээр үзлэг хийлгэхгүй байж болно оо гэсэн эрхийг нь хангахгүйгээр кодыг нь хэлүүлж байгаад шалгасан байсан. Хувийн мэдээлэл шүү дээ, энэ чинь. Хоорондоо юм ярихыг хориглосон. Бүтээл туурвиж байгаа хүмүүс гэдэг утгаар хандаагүй. Кодоор харьцаж болохгүй, дохио зангаагаар ярьчихна биз дээ гэх мэтээр хандсан. Манайх шиг цөөхөн хэдхэн хүнтэй баг тролл баг ажиллуулна гэж юу байхав дээ. Киноны хөрөнгөд 80 орчим сая төгрөг зарцуулсан. Ноорогчид хандиваа өгч, тэр хандиваар бид киногоо бүтээсэн. Хэвлэлийн эрх чөлөөний төлөө ирсэн та бүхэнд баярлалаа” гэлээ.
Харин өмгөөлөгч н.Наранцэцэг “Иргэнээс гарсан гомдлын дагуу мэдээлэл авсан. Хэрэг бүртгэл бол үүсээгүй. 19.3 гэдэг зүйл ангиар мэдэгдэл авсан гэсэн. Өмгөөлөгчийг байлцуулахгүйгээр мэдүүлэг авсан, прокурорын зөвшөөрөл ирээгүй байхад хойшлуулалшгүй гээд биеэс нь гар утсыг нь хурааж авсан, оффист нь үзлэг хийчихсэн зэрэг процессын маш олон алдаа гаргасан. Хэвлэн нийтлэх эрх чөлөө гэдгээс та бүхэн хараарай. Ямар ч зөвшөөрөлгүй албан бусаар 7-8 цаг саатуулна гэдэг бол хүний эрхийн зөрчил” хэмээлээ.