Өнөөдөр хуралдсан УИХ-ын чуулганы хуралдааны үеэр УИХ-ын гишүүн Ө.Шижир нэгэн ноцтой асуудлыг хөндөв. Тодруулбал, УИХ-ын чуулганаар АТГ-ын даргаар З.Дашдавааг улираан томилох асуудлыг хэлэлцэх үеэр эрхэм гишүүн улс төрийн намын санхүүжилт нэрийн дор явагдсан авлигын асуудлыг хөндлөө.
Ө.Шижир гишүүн хэлэхдээ “Парламентад, Засгийн газарт суудалтай ХҮН-ын жишээг авч үзье. Нийтдээ 1 тэрбум 95 сая төгрөгийн хандивыг сая УИХ-ын сонгуулиар авсан байна. Гэтэл энэ мөнгөний 1 тэрбум 45 сая нь зөвхөн нэг компани, түүний хамаарал бүхий аж ахуйн нэгжээс орж иржээ. 37 охин компаниараа дамжуулаад нэг компани л нэг намын 98 хувь хүртэлх санхүүжилтийг гаргаж өгчээ. Энэ бол хуульчилсан авлига шүү.
Дэлхийд түүхэнд ч ийм заваан жишээ байхгүй. Дэлхийн улс төрийн намуудын санхүүжилтийг судлаад үзээрэй. Засгийн газраас мэдэгдээд байсан хууль бус үйл ажиллагаа явуулдаг хамгаалалтын компани, Интермед эмнэлэг, Велла Веста гэж орон сууц ч бас байна. Хэт нэг компаниас хамааралтай, нэг компанийн харьяа байгууллагаас хандиваа босгож буй нь хуульчлагдсан авлига шүү. Компаний нам юм уу. Төрийн эрхийг хууль бусаар худалдаж авах гэсэн ил тод авлига шүү” хэмээлээ. Эндээс харвал MCS компани нь МАН, АН-ын 20 гаруй гишүүнд хандив өгөхөөс гадна ХҮН-ийн бүх гишүүдийг намтай нь санхүүжүүлсэн болж таарах нь ээ.
