“Түрээсийн орон сууцны талаар авах арга хэмжээний тухай” Монгол Улсын Засгийн газрын 2019 оны зургадугаар сарын 05-ны өдрийн 223 дугаар тогтоол, “972 айлын орон сууцанд иргэдийг хамруулах тухай” Нийслэлийн иргэдийн Төлөөлөгчдийн хурлын Тэргүүлэгчдийн долдугаар сарын 04-ний өдөр 115 дугаар тогтоолын дагуу “Буянт-Ухаа 2” хорооллын 972 айлын Түрээсийн орон сууцанд зорилтот найман бүлгийн иргэдийг хамруулахаар батлагдсан билээ. 

Тэгвэл өнгөрсөн хугацаанд тус орон сууцны 30 хувийг энгийн түрээсээр, 30 хувийг таван жилийн хугацаанд түрээслээд өмчлөх хэлбэрээр үлдсэн 40 хувийг газар чөлөөлөлтөд орсон иргэдийг орон сууцжуулах ажил зохион байгуулагдсан юм.
 

Орон сууцанд хамрагдах иргэдийн бүртгэл шилэн цахим хэлбэрээр явагдсан бөгөөд энэ сарын 15-ны өдөр шалгарсан 580 өрх орон сууцанд хамрагдах батламжаа гардан авсан.
“Нийслэлийн орон сууцны корпораци” ХК-ийн зүгээс иргэд шилжин суурьшихад гарч болох хүндрэлүүдээс урьдчилан сэргийлэх арга хэмжээг зохион байгуулж дараах хуваарийн дагуу орон сууцыг хүлээлгэн өгөх аж.

“Буянт-Ухаа 2” хорооллын 972 айлын Түрээсийн орон сууцны эхний зургаан блок байр буюу 1035, 1036, 1038, 1039, 1041, 1042 дугаар байранд орох иргэд энэ долоо хоногийн лхагва гараг буюу өнөөдөр орно. Харин бусад нь пүрэв, баасан гарагт буюу аравдугаар сарын 24, 25-ны өдрүүдэд орон сууцаа хүлээн авч түлхүүрээ авах аж.