Энэ баасан гараг буюу арваннэгдүгээр сарын 29-ний өдөр төвийн, говийн болон зүүн бүсийн аймгуудын нутгаар дулаарна. Тодруулбал, говийн болон зүүн бүсийн зарим аймаг, сумдын нутгаар өдөртөө +3+5 градус хүрч дулаарна. Харин ням гарагаас эхлэн нийт нутгаар эргэн хүйтрэх бөгөөд даваа гарагт өвлийн дунд сар гарна.
Говийн бүс нутгаар өвлийн дунд, 12-р сард цас багатай байна. Дундговийн ихэнх нутгаар өдөртөө -10-12 градус, Өмнөговь, Дорноговийн ихэнх сумдын нутгаар -8-10 орчим градусын хүйтэн өдрүүд тохиох төлөвтэй байна. Ирэх оны нэг ба хоёрдугаар саруудад мөн цас багатай, нэгдүгээр сард говийн бүс нутгаар өдөртөө -18-22 орчим градусын хүйтэн өдрүүд үргэлжлэх ажээ.
