Өнгөрөгч арванхоёрдугаар сарын 29-нд Бангкокоос буцаж явсан 181 хүнтэй “Чежү Эйр” компанийн нисэх онгоц баруун өмнөд нутгийн Муан мужийн Муан олон улсын нисэх буудалд газардах үедээ осолдож, хоёроос бусад нь амь үрэгдсэн харамсалтай осол болсон билээ.
179 хүний амийг авч одсон ослоос хойш долоо хоногийн дараа онгоцны ослын газарт эрлийн ажиллагааг дуусгасан гэдгийг албаны хүмүүс мэдэгджээ. БНСУ-ын Гал түймэртэй тэмцэх газар, цагдаа болон шүүхийн шинжилгээний баг дэлбэрэлтээс хойш бүрэн бүтэн үлдсэн цорын ганц хэсэг болох сүүлний хэсэг болон эргэн тойронд сүүлчийн хайлтыг хийж дуусгасан гэж өчигдөр "Ёнхап" агентлагт албаны хүмүүс мэдэгджээ.
Эрх баригчид үүнээс цааш ямар нэгэн нэмэлт цогцос болон хувийн эд зүйлсийг илрүүлэх магадлал бага гэж мэдэгдсэн аж. Хохирогчдыг гаргах эрэн хайх ажиллагааг өнгөрсөн долоо хоногт бүтэн зохион байгуулсан бол хамтарсан шалгалтын баг ослын шалтгааныг тодруулахаар газар дээр нь шалгалт хийсээр байгаа билээ.
Улмаар 179 цогцсыг бүгдийг нь гаргаж, 151-ийнх нь хувийн эд зүйлсийн хамт ар гэрийнхэнд нь хүлээлгэн өгсөн байна. Гурван хүнтэй гэр бүлийг эс тооцвол үлдсэн 25 цогцсыг өчигдөр орой ар гэрийнхэнд нь хүлээлгэж өгчээ.