Өнөөдөр хуралдсан УИХ-ын чуулганы хуралдаанаар АТГ-ын дарга З.Дашдавааг улираан томилуулах асуудлыг хэлэлцэх үеэр УИХ-ын гишүүн Б.Пүрэвдорж “Өнгөрсөн 2016 оноос хойш бол эрх баригчдын хулгай гаарсан л даа. Ковид, төсөв, ногоон автобус, нүүрс, оффтейкийн хулгай гаарсан. Тухайлбал, нүүрсний хулгай 44 их наядын хохиролтой гэдэг нь үнэн байхгүй юу даа. 2019 оноос өмнө Цагаанхад, Ганцмодны хооронд 29 км газарт нэг машин нүүрсийг 3.000.000 төгрөгөөр тээвэрлэж байсан чинь ковидын үеэр 120 сая төгрөг болгож байгаад баахан хулгай хийсэн.

Өдөрт 600 машин 120 сая төгрөгөөр тээвэрлэхээр 44 их наяд чинь жил гаруйн хугацаанд хийх мөнгө. Цоо шинэ давхар чиргүүлтэй машиныг 360 сая төгрөгөөр худалдаж аваад банкинд нь бензин хийгээд нөгөөх нь дуусаж амжаагүй байхад машиныхаа мөнгийг олчихдог. Энэ хулгайг дээр, дооргүй хийсэн. Үүнд маш хариуцлагатай анхаарч ажилламаар байна. Энэ асуудлыг яаж шийдвэрлэж байна вэ.

Эрх баригч нар хэтэрхий их авлигажуулж байна. Нэг алхам урагшаа, хоёр алхам хойшоо гэсэн зарчмаар л явж байгаа нь үнэн шүү дээ. С зөвшөөрөл бараг л хэрэггүй байтал одоо 20 сая төгрөгөөр үнэлэгддэг авлигын бичиг болж, далд хэлбэрт шилжлээ. Зарим хүмүүс бүтээмжийн менежер гэдгийг шүүмжлээд байх шиг байгаа юм. 950 гаруй хүн ажилладаг, долоо хоногт ганцхан тээвэр хийдэг. 180 хүн хотод ажилладаг, сонгуульд ажилласан хүмүүсээ энд оруулдаг схемийг өөрчлөхийн тулд тэр бүтээмжийн менежерүүд ажиллах ёстой гэж харж байгаа” гэв.

Тэгвэл АТГ-ын даргад нэр дэвшигч З.Дашдаваа “2022 онд нүүрсний хэрэг тодотголтой хэрэг гарсан. Энэ хэргийг шалгах ажлын хэсгийг УЕП-ын тушаалаар ЦЕГ, ТЕГ, АТГ-ын мөрдөн шалгах хэлтсүүд хамтраад шалгаж байна. 103 хэрэгт хэрэг бүртгэл нээж, одоогийн байдлаар 17 хэрэг шүүхэд шилжиж, 14 хэргийг хэрэгсэхгүй болгож, 44 хэрэгт шалгалтын ажиллагаа явж байна. Шүүхээр шийдэгдсэн 17 хэргээс 34 тэрбум төгрөгийн нөхөн төлбөрийг улсад нөхөн төлүүлсэн. 11 тэрбум төгрөгийн хөрөнгийг битүүмжилж, мөрдөн шалгах ажиллагаа үргэлжилж байна” гэсэн хариулт өглөө.