АТГ-ын даргыг улираан томилох асуудлыг хэлэлцсэн чуулганы хуралдааны үеэр УИХ-ын гишүүн О.Цогтгэрэл дараах байр суурийг илэрхийлэв.

Тэрбээр, "Бид авлига гэхээр гарчихсан илрэл дээр яриад байх юм. Учир шалтгаан гэж зүйлийг ярих ёстой байх. Авлигын тодорхой үндэс шалтгаан нь өөрөө төр юм. Монголын төр ийм хэмжээнд данхайчихсан. Эдийн засгийнхаа талд төсөв нь оччихсон. Төрөөс тусгай зөвшөөрөл олгодог бизнесүүд талыг нь эзэлчихсэн байхад авлига байсаар л байх болно.

Нэг гараараа төрөө данхайлгаад, нөгөө гараараа авлигатай тэмц гэдэг нь дүр эсгэсэн байдлаар яваад байна аа. Авлигыг бууруулъя гэж хүсэж байгаа бол хэн нэг даргаас хамааралгүй болгох асуултад хариулт өгөх ёстой юм. Төр сайхан, төрийг томруулна, олон зуун хүнийг ажиллуулах ёстой гэсэн шийдвэр гарч байгаа тохиолдолд авлига буурахгүй ээ. Том авлигачидтайгаа тэмцэж чадахгүй мөртлөө 300 мянган төгрөгийн асуудалд холбогдсон сумдын дарга нарыг аваачаад яллачихсан. Зарим сумдад Засаг дарга хийх хүн ч олдохгүй байна. Ийм асуудлаар шоронд ордог юм бол ажил хийхгүй гээд өргөдлөө өгч байна. Дээшээ зөөлөн, доошоо хатуу байна аа. Ялгамжтай байгаад дургүйцэл их байна” хэмээн О.Цогтгэрэл гишүүн үг хэлэв.

Тэгвэл УИХ-ын гишүүн Л.Мөнхбаясгалан “Хэн нэг сайд аль нэг компаниас хандив авчихаад Засгийн газар нь тухайн компаний хууль бус үйлдлийг илрүүлээд УИХ руу өргөн барьж байгаа үед хандив авсан компаний эрх ашигт үйлчилвэл энэ танай харьяалалд үйлчлэгдэх хэрэг мөн үү” хэмээн АТГ-ын даргаас асуугаад Ерөнхий сайдад хандан “Сая Хөх Монголын хөх туг” гэж аян 21 аймаг тойроод ирлээ. 21 аймаг бол хамтарсан Засгийн газрыг улс орон, үндэсний эрх ашигт нийцэж ажиллах ёстой гэдэг дээр санал нэг байна.

Хамгийн гол нь шударга ёс тогтоох ёстой. Иргэд ажилгүйдэл их байгаа нь шударга бус, авлига их байгаатай холбон тайлбарлаж байна. Таны Засгийн газарт бид нэгдсэн нь улс орны хэмжээний мега төслүүдийг явуулах, шударга ёсны талд зогсох гэж орсон гэж ойлгож байгаа. Та “Энержи ресурс” Ухаа худагийг хууль бусаар авсан гэдгийг та өөрөө ч хэлсэн, Хуульзүйн сайд ч хэлсэн. Энэ асуудлаа яаралтай УИХ руугаа оруулж ирээч ээ. Энэ тэмцлээсээ ухарч няцаж болмооргүй байх юм. Тэмцлээс ухрахгүй гэж байгаа учраас АТГ-ын даргыг улираан томилж байгаа гэж харлаа. Эрх ашгийн хийгээд санхүүгийн зөрчилтэй зарим сайд нарын үйлдэл хэрээс хэтэрлээ. Энийгээ эргэж хараарай” хэмээв.

Тэгвэл энэ асуултад З.Дашдаваа дарга “Тодорхой асуудлыг хууль дүрмийн дагуу шалгаж тогтоож байж л хариулт өгнө. Ашиг сонирхлын зөрчил үүссэн эсэхийг хууль дүрмийн хүрээнд шалгаад хариулт өгнө өө” гэв.

Харин Ерөнхий сайд “Өнөөдөр бидний авлигатай хийх тэмцэл маань шүүхийн түвшинд бүтэн шийдэгдэхгүй байна. Авлига дээр асуудал үүссэн хүмүүс нэлээдгүй асуудал боллоо. Хөрс суурийг нь бэлдэх ёстой юм бишүү гэдэгт санал нэг байна. Сүүлийн үед эдийн засаг өслөө, гэхдээ энэ чинь хоосон тоо юм биш үү гэж ярьж байгаа. Санал нэгдэж байгаа ч тоо байхгүй бол хүртээмж ярих боломжгүй. Авлигатай хийх тэмцэл бүтэн үр дүнд хүрсэн, үгүйн талаар ярьж байна гэдэг нь өөрөө сайн дэвшил. Бид бүр ярьдаггүй байсан шүү.

Бүх нийтээр авлигатай холбоотой асуудлыг сүүлийн гурван жилд ярилаа. З.Дашдаваа дарга энэ байгууллагыг амь оруулсан. Авлига нийгмийн асуудал болсон. Бүх нийтээрээ Хөгжлийн банкнаас эхлээд олон асуудлаар асуулга, хяналтын сонсгол хийлээ. Тиймээс эдгээр асуудлаа хийгээд дуусгах ёстой гэж дэмжиж оруулж ирлээ. Байгалийн баялагтай холбоотой асуудал, орлогын тэгш бус байдал үүссэн хэргүүдээс би нэг алхам ч ухрахгүй. Би албан тушаал дээр ажил хийгээгүй. Эсрэгээрээ амьдралын филосифи минь юм. Явж ирсэн буруу асуудлыг системтэйгээр засна. Зассаар ч байгаа. Бас ч гэж үр дүн гарсан. АТГ 2.3 их наядыг улсад буцаан төвлөрүүлж чадлаа” хэмээн хариулт өглөө.

Ийнхүү асуулт хариулт явагдаж дууссаны дараа чуулганы хуралдаанд оролцсон 112 гишүүнээс 87 нь буюу 79.4 хувийн саналаар З.Дашдавааг улираан сонгох Ерөнхий сайдын саналыг дэмжлээ.