МАН-ын Удирдах зөвлөл өнөөдөр Намын даргын өрөөнд хуралдаж, нийтдээ дөрвөн асуудал хэлэлцжээ. Тус хуралдаанаар нэр бүхий МАН-ын гишүүдийг Удирдах зөвлөлөөс чөлөөлөх шийдвэр гаргасан нь тэдгээр улстөрчид гадаад улсад суух Элчин сайдаар томилогдож байгаатай холбоотой юм байна.
Тодруулбал, УИХ-ын гишүүн асан Д.Сарангэрэл, Ц.Мөнхцэцэг, Б.Саранчимэг нар нь Элчин сайдаар томилогдсон тохиолдолд улс төрийн намаас түдгэлзэх ёстой учраас тэднийг намаас чөлөөлж, Удирдах зөвлөлөөс чөлөөлжээ. Мөн Гэр бүл, хүүхэд залуучуудын хөгжлийн газрын дарга буюу төрийн албан хаагчаар томилогдсон Д.Баярсайхан, Манжуур улсад байх Консулын газар руу томилогдсон Г.Золзаяаг тус тус Удирдах зөвлөлөөс чөлөөлсөн аж.
Түүнчлэн, энэ өдрийн хуралдаанаар Улс төрийн намын тухай хуулийн төсөл хэрэгжиж эхэлсэнтэй холбогдуулан МАН-аас Их хурлаа зохион байгуулж, намын дүрмээ шинэчлэхийн тулд бэлтгэл ажлыг зохион байгуулах, ажлын хэсгийг томилох асуудлыг хэлэлцэхээс гадна намын дэргэдэх судалгааны байгууллага буюу Стратеги академийн удирдлагыг шинээр томилж, намын санхүүгийн тайлангаа хэлэлцжээ.