Баасан гарагаас эхэлсэн ҮБХ-ны ээлжит бус хуралдаан гурван хоног явагдаж, өнөөдөр Төрийн ордонд үргэлжилсэн бөгөөд нэр дэвшигчид өөрсдийн мөрийн хөтөлбөрөө танилцуулж дууссаны дараа ҮБХ-ны гишүүдийн асуулт хариултаар үргэлжилж, гишүүд нууцаар санал өгөв.
Санал хураалт нийтдээ хоёр үе шаттай явагдсан бөгөөд хамгийн бага санал авсан нэр дэвшигч эхний шатнаас хасагдаж, хоёрдугаар шатанд хамгийн олон санал авсан нэр дэвшигчид дахин санал хураах зарчмаар явагдахаар болсон.
Ингээд санал хураалтад 314 ҮБХ-ны гишүүн оролцож О.Цогтгэрэл 196, Б.Пүрэвдорж 82, Ж.Баярмаа 33, Б.Отгонбат 3 хүний санал авав. Улмаар хоёрдугаар шатны санал хураалт гурван нэр дэвшигчийн дунд буюу О.Цогтгэрэл, Б.Пүрэвдорж, Ж.Баярмаа нарын дунд явагдах байсан ч нэр дэвшигч Б.Пүрэвдорж, Ж.Баярмаа нар нэрээ татсанаар хоёрдугаар шатны санал хураалт цуцлагдаж, нэр дэвшигч О.Цогтгэрэл нийт гишүүдийн 62.4 хувийн санал авч, АН-ын дараагийн даргаар сонгогдлоо. Түүнийг тун удахгүй болох АН-ын Их хуралд танилцуулж, ёсчлон батламжлах юм.