Завхан аймгийн Түдэвтэй сумын Цорго багийн нутаг сумын төвөөс баруун зүгт 10 км-т орших Талын-Улаан гэх газарт Завхан аймгийн Сонгино сумаас Тосонцэнгэлийн чиглэлд явсан гурван зорчигчтой суудлын автомашин цасанд суужээ.
Энэ дуудлагыг аймгийн Онцгой байдлын газар хоёрдугаар сарын 27-ны 00:40 цагт хүлээн авсан байна. Тус аймгийн Онцгой байдлын газрын Сонгино сум дахь Эрэн хайх, аврах бүлгийн алба хаагчдыг очиход иргэн М-ын “Хьюндай соната 7” загварын суудлын автомашины хоёр дугуй хагарч, цасанд суусан байсныг 2 цаг ажиллаж татаж гаргажээ.
Говь-Алтай аймгийн Есөнбулаг сумын Наран багийн нутаг аймгийн төвөөс баруун урд зүгт 28 км-т орших Дөтийн даваа хэмээх газарт Есөнбулаг сумаас Наран багийн чиглэлд явсан дөрвөн зорчигчтой суудлын автомашин цасанд суужээ.
Энэ дуудлагыг хоёрдугаар сарын 27-ны 04:50 цагт Онцгой байдлын газар хүлээн авсан байна. Тус аймгийн Онцгой байдлын газрын Эрэн хайх, аврах салбарын алба хаагчид очиж, иргэн Э-ын “Тоёота Ландкруйзер-80” загварын суудлын автомашины цасанд суусан байсныг 30 минут ажиллаж татаж гаргасан хэмээн ОБЕГ-аас мэдээлэв.