Нүүрсний сонсголын эхний дөрвөн өдрийн хэлэлцүүлэг өнгөрөгч долоо хоногт болж, эхний дөрвөн өдрийн хэлэлцүүлгээр орон нутгийн өмчит "жижиг" Тавантолгой ХК-ийн асуудал болон "Эрдэнэс Тавантолгой" ХК-ийн эхний асуудлыг хэлэлцсэн билээ. 

Тэгвэл ирэх долоо хоногийн даваа гарагт хоёрдугаар том хэлэлцүүлэг буюу "Эрдэнэс Тавантолгой" ХК-тай холбоотой бүх тендер, гэрээний асуудлыг ярихаар болж, төрийн томчуудаас эхлээд улстөрчдийг гэрчээр дуудаад буй. Тэгвэл Түр хорооны энэхүү ажлыг юу ч биш болгох гэсэн санаархал нэр бүхий улстөрчдөөс гарч, түүнд нь тусгай албад хүртэл оролцож байсан хэмээн Түр хорооны дарга, УИХ-ын гишүүн, ХЗДХ-ийн сайд Б.Энхбаяр мэдэгдлээ. 

Тэрбээр, "Нүүрсний сонсголыг юу ч биш болгох, анхаарлыг өөр тийш чиглүүлэх, хянан шалгалтын ажиллагаанд нөлөөлөх, саад учруулах санаархал, үйл ажиллагаа Түр хорооны даргаар томилогдсон цагаас хойш тасралтгүй явагдав. Тусгай албанд ажиллаж байсан албан тушаалтнууд ч үүнд оролцлоо. Сонсгол товлосон ёсоороо болно.

Нүүрсний жинхэнэ хулгайчид илчлэгдэнэ. Үнэн нүүр царай нь ил болно. Ард түмэн хэрсүү болсон. “Гөлөг төөрүүлэх” аливаа мэдээлэл, арга заль, захиалгатай мэдээлэлд бүү авт. УИХ бол ард түмний төлөөллийн дээд байгууллага. УИХ-ын гишүүн бол ард түмэндээ үнэнч байхаа Үндсэн хуульд тангарагласан ард түмний төлөөлөгч. УИХ-ын Түр хороо бол гагцхүү нотлох баримтын хүрээнд нүүрсний хулгайг илчлэх, ард түмэнд юу болсон талаарх мэдээллийг өгөх үндсэн чиг үүрэгтэй. Энэ үүргээ хэрэгжүүлнэ.

Авлигатай хийх тэмцэлд улс төрийн манлайлал, эр зориг, тууштай байдал нэн чухал. Улс төрийн нам бол хулгайг хаацайлдаг нуувч биш. Нэг хүн, нэг нам ч Монгол Улс, Монголын ард түмний нийтлэг эрх ашиг, үнэт зүйлийн өмнө жижигдэнэ. Тиймээс сонсголыг бүү намчирхаж, улс төржүүл. Тэгэхийг л нүүрсний хулгайчид хүснэ. Бүү тийм ов зальд автаарай" хэмээлээ.