УОК-оос өдөр бүрийн 11:00 цагт өвөлжилтийн талаарх мэдээлэл хийхээр болсон билээ. Энэ хүрээнд УОК-ын нарийн бичгийн дарга Т.Баярхүү, ЦУОШГ-ын Урьдчилан мэдээлэх хэлтсийн дарга Л.Оюунжаргал нар мэдээлэл өгч байна.

Урьдчилан мэдээлэх хэлтсийн дарга Л.Оюунжаргал:- 25-наас баруун аймгуудаар цас орж эхэлнэ. 27-ны өдрөөс эхлэн эрч нь нэмэгдэж зүүн аймгууд, говийн аймгуудаар ч цас орж, салхины эрч илүү их нэмэгдэх төлөвтэй байна. Энэ сарын 27-ноос хойш иргэд  хол замд, тэр дундаа зүүн аймгуудаар зорчих гэж байгаа бол бодолцож, түр азнахыг зөвлөе. 28-29-нд баруун аймгуудаар дахин цас орно. Ер нь хоёрдугаар сар дуустал цас орж, хүйтрэх байдал үргэлжлэх төлөвтэй байна.

ЦАСАН БҮРХҮҮЛ: -2024 оны хоёрдугаар сарын 20-ны байдлаар нийт нутгийн 80 гаруй хувьд цастай байгаагаас Алтай Хангай, Хэнтий, Хөвсгөлийн ууларг нутаг, Хан Хөхий, Хантайшир, Монголын Дорнод тал болон говийн нутгийн зарим хэсгээр 10-51 см, бусад нутагт 1-9 см хунгарлаж шуурсан газартаа 80 см, гуу жалгандаа 100 см хүртэл зузаан цастай байна.Мөн тусгай техник хэрэгслээр зам гаргаж байгаа ч хоёр цаг үргэлжлэх цасан шуурганы улмаас зам харгуй дахин цасанд дарагддаг талаар УОК-ын нарийн бичгийн дарга Т.Баярхүү хэлж байна.