Дэлхийн банкны 19.5 сая ам.долларын санхүүжилттэй “Цахим эрүүл мэнд” төсөл зургаан жил үргэлжилсэн ч үр дүн гараагүй. Улмаар аудитын дүгнэлтээр хангалтгүй үнэлэгдсэнтэй холбогдуулан Дэлхийн банкнаас уг төслийг зогсоож, Засгийн газраас нийт 1.7 сая ам.долларыг нэхэмжилсэн. Монгол Улсын төсвөөс дээрх зээлийн төлбөрийн хүүг төлж байсан юм.
АТГ энэ хэргийг мөрдөн шалгаад төслийн гүйцэтгэгч БНСУ-ын “Taihan Cable & Solution” компани нь хуурамч баримт бичиг бүрдүүлэх замаар төслийн сонгон шалгаруулалтад хууль бусаар шалгарч, гэрээнд тусгагдсан төслийн хөрөнгийг үр дүнгүй захиран зарцуулж улсад их хэмжээний хохирол учруулсан болохыг тогтоосон. Ингээд АТГ-ын мөрдөн шалгах ажиллагааны үр дүнд Өмнөд Солонгосын дээрх компаниас 1.7 сая ам.доллар буюу ойролцоогоор 5.8 тэрбум төгрөгийн хохирлыг Монгол Улсад эргүүлэн төлүүлж, улсын төсвөөс дээрх зээлийн төлбөрийн хүүг төлж байсныг зогсоолоо.
