Японы Шизүока дүүргийн шүүх хүн амины хэргээр шоронд 47 жил гаруй хориод улмаар цагаатгасан 89 настай И.Хакамадад 217 сая иен буюу 1,44 сая долларын нөхөн төлбөр олгохоор шийдвэрлэснийг NHK телевиз, "Майничи" сонин мэдээллээ.

Уг мужид 1966 онд нэг айлын дөрвөн хүнийг хөнөөсөн хэрэгт буруутгагдсан түүнд цаазаар авах ял оноосон ч ноднин аравдугаар сард болсон шүүх хурлаар дүүргийн шүүх цагаатгажээ. Мөрдөн байцаах албаныхан хэрэгт хуурамч нотлох баримт бүрдүүлсэн бололтой.

И.Хакамадагийн өмгөөлөх баг түүнийг 47 жил долоон сар шударга бусаар хоригдсон хэмээн үзээд, нөхөн төлбөр авахаар өнгөрсөн нэгдүгээр сард шүүхэд "И.Хакамада нь шоронд хоригдсоныхоо хор уршгийг одоо хүртэл амссаар байгаа" гэсэн нэхэмжлэл гаргасныг шүүх хүлээн зөвшөөрөв. 47 жил шоронд хоригдохдоо 33-т нь цаазлахыг хүлээсэн бөгөөд сэтгэл санаа болон бие махбодийн зовлон зүдгүүр "маш хүнд байсан" гэнэ. Энэхүү нөхөн олговор нь Японы түүхэн дэх дээд амжилт бол 47 жил долоон сар хилсээр хоригдсон нь Гиннесийн номд бүртгэгджээ.

Түүний хуулийн өмгөөллийн бүлэг Шизүока муж болон Үндэсний Засгийн газрын эсрэг шүүхэд нэхэмжлэл гаргахаар төлөвлөж буйгаа мэдэгдлээ. Шүүхийн нөхөн олговрын шийдвэрийн талаар өмгөөлөгч нь "Эрх баригчид 200 сая иенээр цайруулж боломгүй гэмт хэрэг үйлдсэн" гэж ярьсан байна.