Шударга өрсөлдөөн хэрэглэгчийн төлөө газраас өчигдөр цаг үеийн асуудлаар мэдээлэл хийлээ. Тухайлбал, тус газраас “Мобиком корпораци”, “Юнивишн”, “БСБ электроникс” “Нарантуул-2” худалдааны төв болон бусад байгууллагад шалгалт хийжээ. Энэ асуудлыг ШӨХТГ-ын Хэрэглэгчийн эрхийг хамгаалах газрын дарга Ш.Цэрэндуламаас тодрууллаа.
-ШӨХТГ-аас хэчнээн байгууллагад, ямар хяналт шалгалт хийсэн бэ?
-ШӨХТГ-аас 2019 оны эхний улиралд хийсэн хяналт шалгалтын ажлуудаасаа танилцууллаа. Энэ хугацаанд 11 хяналтын шалгалтын ажил хийгдсэн бөгөөд нийт 56 аж ахуйн нэгжийг хамрууллаа. Манай газрын хуулиар хариуцсан нэг чиг үүрэг нь Монгол хэлний тухай хуулийн хэрэгжилтэд хяналт тавих асуудал байдаг учраас энэ чиглэлээр шалгалт хийлээ. Мөн иргэдээс ирсэн гомдлын хүрээнд хяналт шалгалт хийлээ. Энэ хүрээнд бараа бүтээгдэхүүний хэлний асуудал, аж ахуй нэгж байгууллагын хаяг, зар сурталчилгаанд хяналт шалгалт хийсэн.
-Тухайлбал, ямар байгууллагаас энэ төрлийн зөрчил илэрсэн бэ?
-Иргэнээс ирсэн “БСБ электроникс” компаниас телевизор худалдан авсан нь баталгаат хугацаандаа эвдэрсэн тухай гомдол мэдээллийг Нийслэлийн прокурорын газарт бүртгүүлсэн. Улмаар тус компанид зөрчил, шалган шийдвэрлэх ажиллагаа явуулахад, Монгол хэлний тухай хуулиар тогтоож хориглосон зохицуулалтыг зөрчсөн байлаа. Тодруулбал, хэрэглэгчдэд хүргэж буй гарын авлага, анхааруулга, санамжийг гадаад хэл дээр өгсөн. Тиймээс Зөрчлийн тухай хуулиар, тухайн байгууллага үйлчлүүлэгч, хэрэглэгчийг үнэн зөв мэдээллээр хангах, зөрчлийг арилгах, хуулийн этгээдийг таван мянган нэгжтэй тэмцэх хэмжээний төгрөгөөр торгох арга хэмжээ авна. Мөн Монгол хэлний тухай хуулийг зөрчсөн гэж үзэн мөнгөн торгууль ногдуулахаар боллоо.
-“Ай Пи Тв”-ээр үйлчлүүлэгчид багагүй гомдол ирүүлсэн гэсэн. Энэ талаар мэдээлэл өгөөч?
-“Юнивишн” ХХК нь сингл буюу дан “Ай Пи Тв” үйлчилгээний талаар мэдэгдэлгүй үнэ тарифаа нэмсэн, авахыг хүсээгүй нэмэлт үйлчилгээг хүчээр өгч, нэмэлт төлбөр авсан гэж иргэд гомдол мэдүүлсэн. Уг зөрчлийг шалгаж таван сая төгрөгийн торгууль ногдуулж, иргэдийг хохироож буй зөрчлийг таслан зогсоолоо.
-Мобикомтой холбоотой асуудал ямар шатанд явж байгаа вэ?
-Агентлагийн даргын 2019 оны нэгдүгээр сарын 24-ны өдрийн удирдамжаар “Мобиком корпораци” ХХК-ийн үйл ажиллагааг прокурорын хяналтад шалгасан юм. Хяналт шалгалтаар, хэрэглэгчдийг төөрөгдүүлэх замаар байгуулсан олон мянган хэрэглэгчийн эрхийг хохироосон гэрээг хүчин төгөлдөр бус гэж үзсэн. Тиймээс зөрчил шалган, шийдвэрлэх, ажиллагааг дуусгаж, “Мобиком корпораци” ХХК-д Зөрчлийн тухай хуулийн 10.2 дугаар зүйлийн гуравдахь хэсэгт зааснаар 20 сая төгрөгийн торгууль ногдууллаа.
-ШӨХТГ-аас цаашид хэрэглэгчдийн эрх ашгийг хамгаалах чиглэлээр ямар ажил хийх вэ?
-Олон улсын хэрэглэгчийн байгууллагуудын дунд Улаанбаатарын уулзалт арга хэмжээг энэ сарын 6-7-нд зохион байгуулах гэж байна. Арга хэмжээнд БНХАУ, ОХУ, Япон, БНСУ, Кувейт улсын хэрэглэгчийн байгууллагын дарга, удирдах албан тушаалтнууд оролцж сайн туршлагаа харилцан солилцохоор болсон.