Эрүүл мэндийн сайд  С.Энхболд өчигдөр буюу ням гарагт ЭМЯ-ны харьяа "Амгалан" амаржих газарт ажиллав. "Амгалан" амаржих газар Баянзүрх, Сүхбаатар дүүргийн 510 мянган хүн амын 137.000 нөхөн үржихүйн насны эмэгтэйчүүдэд тусламж үйлчилгээ үзүүлдэг.  

Тус эмнэлэгт 2021 оны эхний арван сарын байдлаар 6031 эх амаржсан ба эхийн эндэгдэл гараагүй үндсэн тусламж үйлчилгээ хэвийн явагдаж байна. Амаржих газар нь  эмэгтэйчүүдийн  тусламж үйлчилгээ, тэр дундаа хавдрын эрт илрүүлэг, мэс заслын тусламж үйлчилгээг нээлттэй болон дурангийн аргаар хийж олон шинэ инновацийг нэвтрүүлэн ажиллаж байна.

Коронавируст халдвар (КОВИД-19)-н тусламж үйлчилгээг 849 жирэмсэн эх болон эмэгтэйчүүдэд  үзүүлсэн байна.  Ковидын тусламж үйлчилгээнд ажилласан эмч ажилчдын цалинг гурав дахин илүү цагийг хоёр дахин нэмж олгон, дархлаажуулалтын бэлдмэл болон хүнсний нэмэлт багцаар ханган ажиллаж байна.

Энэ үеэр Эрүүл мэндийн сайд С.Энхболд тус амаржих газарт шаардлагатай суурин рентген аппарат, ариутгалын тоног төхөөрөмжийг шийдвэрлэж өглөө. Эрүүл мэндийн сайд эх барих, нярай, эмэгтэйчүүдийн тусламж үйлчилгээг шинэ шатанд гаргах амаржих газрыг эх барих эмэгтэйчүүд,  эмэгтэйчүүдийн хавдрын тусламж үйлчилгээний төрөлжсөн мэргэжлийн эмнэлэг болгон ажиллах  чиглэл өглөө. Мөн Гамшгийн тухай хуульд заасны дагуу эм хэрэгслийн нөөцийг гурван сараар бүрдүүлэх үүрэг чиглэлийг амаржих газрын удирдлагуудад өгсөн юм. 

Энэ үеэр Эрүүл мэндийн сайд “Салбараа цахимжуулах бодлогыг барьж ажиллаж байна. Эх барих, эмэгтэйчүүд, нярайн тусламж үйлчилгээг анхаарч ажиллах нь яамны тэргүүлэх бодлого байх болно" гэжээ.