Онцгой байдлын байгууллагын гол цөм нь ахлагч нар байдаг. Тэд бол эрс тэс цаг ууртай Монгол орны нөхцөлд гал ус, гамшиг ослыг сөрөн ард иргэд, улс эх орноо хамгаалан тэргүүн эгнээнд бат зогсогч баатрууд юм. Эдгээд баатруудаа урамшуулах, албандаа урам зоригтой ажиллах хүслийг нэмэгдүүлэх зорилготой “Залуу ахлагч нарын цугларалт -2023” Улаанбаатар хотноо болж байна.
Мэргэжлийн ур чадвар, ёс зүйгээрээ манлайлж, үр бүтээлтэй ажиллаж хамт олноосоо шалгарсан шилдэг ахлагч нар энэ удаа гадаад хэл, цэргийн дүрмийн мэдлэг, буудлага, багаар ажиллах, бие бялдрын бэлтгэлжилтийн цогцолбор тэмцээн гэсэн төрлүүдээр өрсөлдөж, шилдгийн шилдгүүдээ тодруулах юм.
Гадаад хэл, цэргийн дүрмийн мэдлэг, буудлагын шалгаруулалт өмнөх өдрүүдэд болж дууссан бол өнөөдөр бие бялдаржилтын цогцолбор тэмцээн Налайх дүүргийн спорт цогцолборт үргэлжилж байна.
“Залуу ахлагч нарын цугларалт”-д Улаанбаатар хүрээний газар, хэлтэс, анги байгууллага болон 21 аймгийн Онцгой байдлын газраас шалгарсан 18-35 насны тав, таван ахлагч оролцож байна.
