Палестины Исламын шашинт Хамас бүлэглэл Газын зурвас болон Израил руу 3000 гаруй удаа пуужин харвасны улмаас бүс нутаг дайны бэлэн байдалд шилжээд байгаа юм.

Хамас Еврейчүүдийн Симчат Тора хэмээх үндэсний томоохон баярын үеэр гэнэдүүлж дайрсан нь 1973 олны Израил-Арабын дайнаас хойшхи хамгийн их хохирол дагуулсан цохилт болж буйг хэвлэлүүд онцолж байгаа юм. Тэгвэл дайнтай бүс нутагт манай улсаас хичнээн иргэн байгаа, ЭСЯ-наас ямар арга хэмжээ авч байгаа талаар ГХЯ-наас тодруулахад дараах мэдээллийг өглөө.

ГХЯ “Израил болон Палестинд үүсээд байгаа нөхцөл байдалд туйлын санаа зовниж байгаа бөгөөд эрдэнэт хүний амь нас олноор үрэгдэж байгаад гүнээ харамсаж байна. Энэ нь бүс нутгийн энх тайван, тогтвортой байдалд ноцтой нөлөөлж, цаашид таамаглашгүй үр дагаварт хүрэх эрсдэлтэй. Иймд талууд яриа хэлэлцээ, дипломат үйл ажиллагаа болон сайн санааны үндсэн дээр даруй гал зогсоож, хурцадмал байдлыг намжаах нь нэн чухал байна.

Тус улсад одоогийн байдлаар манай улсын 200 гаруй иргэн байгаа бөгөөд монгол иргэдтэйгээ Анкарад суугаа ЭСЯ-наас холбоотой ажиллаж байна. Одоогоор үүсээд байгаа нөхцөл байдлын улмаас хохирсон иргэн байхгүй. Тус улсад онц байдал зарлаж нийтийн тээвэр, дэлгүүр, албан байгууллагууд ажиллахгүй, энгийн иргэдийг гэрээсээ гарахгүй байхыг зөвлөж байгаа. Аюулгүй байдлын үүднээс томоохон авиакомпаниуд нислэгүүдээ цуцалж, хойшлуулж байна. Иймд тус улсад оршин суугаа иргэддээ оршин суугаа газраасаа гарахгүй, олон нийтийн газраар зорчихгүй байх, Израилын талын холбогдох байгууллагаас энгийн иргэдэд өгч буй зөвлөмж, анхааруулгыг чанд даган мөрдөж, анхаарал болгоомжтой байхыг анхааруулж байна” гэлээ.