"Хантай" өөртөө үйлчлэх зуслах, "Хантай" зөгийн аж ахуйг Булган аймагт нутгийн иргэдтэй нэгдэж "босгосон" Ч.Батцэцэг рүү ганц бие өрх толгойлсон, ганцаардсан сэтгэлийн шархтай эмэгтэйчүүд “Тань дээр очих юмсан, арав хоног ч болов амрах юмсан, амьдрах юмсан. Ажилд нь туслаж болох уу? Цалин хэрэггүй, байр хоол байхад л болно” гэж ханддаг. Гэвч тус зуслан амрагчийн цөөн гэртэй, тоотой хэдхэн ажлын байртай болохоор тэр бүр туслаж чаддаггүй тухайгаа тэрбээр нүүр номондоо бичиж байв.

Үүний дараа сайхан сэтгэлт иргэд хандив өгч "Хантай" зуслан дээрх бүсгүйчүүдэд зориулсан хоёр ч гэртэй болжээ. Тодруулбал, нэг өдрийн дотор 80 гаруй хүнээс 8 сая орчим төгрөгийн хандив цуглаж Ч.Батцэцэг ээжүүдийнхээ амрах гэрүүдийг шалавхан бэлдээд ирэх зургаадугаар сараас хүлээж авна гэж мэдэгдлээ. Мөн "Хантай" хоршооны гишүүд хүүхэд харах тоглоомын гэр ч тохижуулах санаачилга гаргасан байна.

Ч.Батцэцэг "Олон бүсгүйчүүд гэр бүлийн хүчирхийлэл, араар тавилт, төрсний дараах сэтгэл гутрал, төв суурин газрын стресс гээд сэтгэлийн өвчинд шаналж байх шиг. Би өөрөө аль алийг нь үзсэн адилхан ганц бие ээж болохоор нүдээ аниад нүүр буруулж зүрхлэхгүй юм. Манай дээр саяхан нэг ганц бие ээж хүүхэдтэйгээ ирсэн. Наашаа гэх хэцүү, цаашаа гэх хэцүү, хамт олноороо ярилцаад Хантай зусландаа түр байрлуулж, сэтгэл санаагаар дэмжих гэж хичээж л байна" гэв.