БСШУС-ын яамнаас Ерөнхий боловсролын сургуулийн орчны стандартыг боловсруулан гаргажээ. Уг стандартын талаар БСШУС-ын яамны Ерөнхий боловсролын бодлогын газрын дарга Т.Ням-Очироос тодрууллаа. 

-Сургуулийн орчны стан­дарт шинээр бий болж бай­гаа гэх юм. Стандарт бат­лагд­сан уу. Ямар, ямар зүй­лийг стандартчилсан бэ?

-1997 онд сургуулийн орчны стандарттай холбоотой бод­ло­гын баримт бичгийг боловс­руулж байсан ч эцэс­лэн батлагдаагүй. Өөрөөр хэлбэл, өнөөдрийг хүртэл сургуулийн орчны стандарт гэдэг зүйл байгаагүй гэсэн үг. Хот хөдөөгийн ялгаа ихсэх тусам, нийгэм хөгжихийн хэрээр тогтсон стандарттай байх шаардлага гарч байна. Үүний дагуу 2018 онд БСШУС-ын яамны сайдын тушаалаар ажлын хэсэг байгуулагдаж, гурван  удаа ЕБС-иудад нөхцөл байдлын үнэлгээ хийсний үндсэнд “Сургуулийн орчны стандарт”-ыг боловсруулж дууслаа. Энд бид гурван төрлийн стандартыг боловсруулсан. Үүнд “Цэцэрлэг, ЕБС, дотуур байрны эрүүл ахуйн стандарт” гэж байгаа. Энэ стандартыг Эрүүл мэндийн яамтай хамтарч боловсруулан Стандарт хэм­жил­зүйн газарт хүргүүлж одоо­гоор эхний хэлэлцүүлгийг хийсэн. Хэлэл­цүүлгийн явцад ЕБС болон дотуур байрны стандартыг салгаад, “ЕБС-ийн орчны аюулгүй байдлын стан­дарт”, “ЕБС-ийн дотуур байрны үйлчилгээний стандарт” гэж батлахаар хэлэлцэж байна. ЕБС-ийн орчны аюулгүй байдлын стандарт гэдэгт сургуулийн хашаа, хайс ямар байх ёстой, гэрэлтүүлэг, камержуулалт нь ямар байх вэ, гадаад орчин ямар байх зэргийг нарийн тусгасан.  Харин дотуур байрны үйл­чил­гээ­ний стандарт гэдэгт тухайн дотуур байр аюул­гүй, эрсдэлгүй, айдас, дарамтгүй үйлчилгээг хүүх­дэд хүргэхийн тулд ямар стандартыг мөрдөх ёстой вэ гэдгийг тусгасан. Бид уг стандартыг сайдын зөвлөлийн хурлаар хэлэлцэн Стандарт хэмжилзүйн газарт хүргүүлсэн байгаа.

-Стандартыг хэзээнээс мөрдөж эхлэх вэ. Оноос өмнө батлагдах уу?

-Батлагдсан өдрөөсөө хэрэг­жиж эхэлнэ. Бид сайдын зөв­лө­лөөр хэлэл­цүү­лэн, бүх мэргэжлийн бай­гуул­ла­гуу­дын оролцоог хангачихсан. Шаард­ла­га­тай бичиг баримтууд бүрд­сэн гэсэн үг. Удахгүй стандарт батлагдаж гарахад ЕБС-иуд гадна орчиндоо тохижилт хийх, ариун цэврийн өрөөгөө тохижуулах гэх мэт тохижилтын ажлуудад тавигдах нэгдсэн стандарттай болно гэсэн үг.  

-Сургуулиудад нөхцөл байд­лын үнэлгээ хийсэн гэ­лээ. Сургуулиудын орч­ны нөх­цөл байдал ямар байна вэ? 

-Бид ийм байх ёстой гэсэн шинэ шаардлага тавихаасаа илүүтэй одоо байгаа нөхцөл байдлаа яаж аюулгүй бол­гох вэ гэдэг талаас нь анхаарч, боловсруулсан. Мөн менежментийн асуудлуудыг нарийн зааж өгсөн. Өөрөөр хэлбэл, аюулгүй байхын тулд сургууль хэрхэн, яаж ажиллах ёстой вэ гэдэг зөвлөмжүүдийг тусгасан гэсэн үг. Одоогоор тогтсон стандарт гэж байхгүй учраас сургуулийн удирдлага, байршил зэрэг хүчин зүй­лүү­дээс шалтгаалаад орчны нөхцөл байдал харилцан адилгүй байна. 

-Сургуулийн орчны стан­дарт батлагдлаа гэхэд сургуулиуд хэрхэн хэрэг­жүүлж байна вэ гэдгийг ямар журмаар хянах вэ? 

-Стандарт батлагдан гарсны дараа бид уг стандартыг хэрэгжүүлэх арга зүйн зөвлөмж гэж гаргахаар бэлэн болгоод байна. Өөрөөр хэлбэл энэ стандартыг хэрэгжүүлэхийн тулд гадна тохижилт, хашаа хайсны өндөр зэрэгт хэрхэн анхаарах, стандартыг хэрэг­жүү­лэхийн тулд яах вэ гэдгийг уг арга зүйн зөвлөмжид тодор­хой зааж өгнө. Зөвхөн стандартыг батлаад орхих биш, менеж­мен­тийн шаардлагыг тавьж өгсөн учраас тухайн сургуулийн удирд­лага уг стандартын хэрэг­жил­тэд хэрхэн хяналт тавих вэ гэдгийг менежментийн шаард­лага дотор тодорхой тусга­сан байгаа. Өөрөөр хэлбэл, хэрэг­жүүлэх меха­низм, хяналт тавих механизм­тай цогц стандарт болох юм.