Монголын Ардчилсан холбооноос өнөөдөр “Монгол Улсын төлөө зүтгэе” уриатай жагсаал хийлээ. Жагсагчид Үндэсний аюулгүй байдлын зөвлөл, ҮАБЗ-ийн гишүүд болон УИХ-ын гишүүдэд мэдэгдэл хүргэх зорилготой аж. Энэхүү жагсаалд Монголын Ардчилсан холбооны гишүүд, дэмжигчид сайн дурын үндсэнд оролцож байна. Жагсагчид эрх баригчдад тавьж байгаа шаардлагад төрийн үйл ажиллагааг сайжруулах, хөдөлмөрийн дотоод зээлээ хамгаалан дэмжлэг үзүүлэх, хүн амын эрүүл мэнд, удмын санд учрах цар тахлаас үүдэлтэй сөрөг нөлөөллүүдийг бууруулах, гадаад өрүүдийг тэглэх, Оюутолгой, Хармагтайн ордын ашиглалтын талаар улс орны эрх ашигт нийцсэн нэгдмэл байр суурьт хүрэх зэрэг тулгамдсан асуудлуудыг яаралтай хэлэлцэн шийдвэрлэхийг сануулж байна гэсэн юм. Энэ талаар АТГ-ын дэргэдэх Олон нийтийн зөвлөлийн дарга Г.Баасан “Монголын Ардчилсан холбоо одоогоос 31 жилийн өмнө монголчуудын аз жаргалын төлөө, шударга, тэгш ёсны төлөө тэмцсэн. Гэвч тэр тэмцлийг бусад муу аргатангууд завшчихлаа. Монгол хүнийг эх оронд нь ая тухтай, сэтгэл тайван, хүрэлцээтэй эдийн засагтай амьдардаг тогтолцоог би болгоно. Бид өнөөдрөөс тэмцэхээ илэрхийлж байна” гэсэн юм.