Солонгосын дайнд амиа алдсан АНУ-ын цэргийн шарилыг БНАСАУ эх орон руу нь буцаажээ. Уг үйл ажиллагаа өнөөдөр болж буй бөгөөд цэргийн шарилыг ачсан Нэгдсэн улсын цэргийн онгоц БНСУ-ын цэргийн баазад газардсан байна.

Өнгөрсөн сард АНУ-ын Ерөнхийлөгч Доналд Трамп, БНАСАУ-ын тэргүүн Ким Жон Ун нар Сингапурт түүхэн дээд хэмжээний уулзалт хийсэн билээ. Энэ уулзалтаар талууд хэд хэдэн тохиролцоонд хүрсний нэг нь дайнд амь үрэгдсэн америк цэргүүдийн шарилыг буцаан өгөх байсан юм.

Эх сурвалжийн мэдээлснээр энэ удаа нийтдээ 55 шарилыг АНУ-ын цэргийн баазад хүргэжээ. Харин АНУ-ын Батлан хамгаалах яамнаас мэдээлснээр Солонгосын дайнд АНУ-ын 35 мянга гаруй цэрэг амь үрэгдэж, 7700 дайчин нь сураггүй алга болсон байна. Цаашид ийм үйл ажиллагааг үе шаттайгаар зохион байгуулах юм байна.