Цар тахлын улмаас улс орнуудын тогтоосон хилийн хязгаарлалт, хорио цээрийн дэглэмийн дагуу гадаад улсад суралцагчид хил нэвтрэх, танхимаар суралцах боломж хязгаарлагдсан байгаа билээ. Тэгвэл Гадаад харилцааны яамнаас энэ асуудалд тууштай анхаарч, дипломат шугамаар яриа хэлэлцээр хийсний дүнд ОХУ-д суралцаж буй оюутнууд танхимаар хичээллэх боломж нээгдсэн талаар өчигдөр Гадаад харилцааны сайд тодруулга өгөхдөө онцоллоо.
Тэрбээр, "Япон улсад Засгийн газрын тэтгэлгээр суралцаж байгаа оюутнууд, БНСУ-ын зохих ангиллын урт хугацааны сургалтын визтэй оюутнуудыг саадгүй нэвтрүүлж байгаа. Харин БНХАУ-ын хувьд гадаадын бүх улсаас тус улсад суралцаж байгаа оюутнуудыг хүлээж авахгүй байх шийдвэр хэвээр үргэлжилж байна. Тиймээс Монгол оюутнуудыг хилээр нэвтрүүлэх асуудал шийдэгдээгүй байгаа. БНХАУ-руу зорчих хүсэлтээ 260 гаруй иргэн илэрхийлээд байна. Тухайлбал, БНХАУ-ын иргэдтэй гэр бүл болсон, тэдний дундаас төрсөн хүүхэд 129, хамтран амьдрагч статустай 32, хөдөлмөр эрхлэгч 70, эмчлүүлэх шаардлагатай 30-аад иргэн хандсан.
Бид БНХАУ-ын талтай бүхий л түвшинд яриа хэлэлцээгээ үргэлжлүүлэн ажиллаж байна. Тус улс руу зорчих хүсэлтэй иргэдийг ойрын хугацаанд нэвтрүүлэхээр онцгой анхаарч ажиллаж байгаа. Монгол Улсын 170 гаруй мянган иргэн гадаадын 90 орчим оронд оршин суудаг. Үүнээс 46 мянга нь оюутан залуус байна” хэмээлээ