Газрын тос боловсруулах үйлдвэрийн явцын талаар Уул уурхай хүнд үйлдвэрийн яамнаас мэдээлэл өглөө. Тодруулбал, үйлдвэрийн технологийн бус барилгын ажил /EPC-1/-д шаардлагатай 4000 тонн бараа материал 2021 оны арванхоёрдугаар сарын 24-ний өдөр БНХАУ-ын Тяньжин боомтод ирж ачааг боомтын талбайд бүрэн буулгасан бөгөөд ачааг Эрээн боомт хүртэл тээвэрлэн авч ирэх ажлыг зохион байгуулж байгаа аж.
Мөн лицензгүй технологийн байгууламжийн ажил /EPC-2/-ын ерөнхий гүйцэтгэгчийг сонгон шалгаруулах тендерийг мөн сарын 30-нд хүлээн авч үнэлгээний ажил хийж эхлэсэн бол тос дамжуулах хоолойн төслийг санхүүжүүлэх, инженерчлэл, худалдан авалт, барилга угсралтын ажлыг гүйцэтгэх сонирхолтой компанийг сонгон шалгаруулалтын тендерийг 2021 оны аравдугаар сарын 23-ны өдөр хүлээн авч тендерт шалгарсан компанитай байгуулах гэрээний төслийг боловсруулж байгаа талаар мэдээллээ.
Газрын тос боловсруулах үйлдвэр ашиглалтад орсноор:
Түлш, шатахууны импортын хамаарлаас гарна.
Нефть-химийн аж үйлдвэрийн шинэ салбар бий болно.
Улсын төсөвт дорвитой хувь нэмэр оруулна.
Шатахууны дотоодын хэрэгцээний 55 орчим хувийг хангана.
Гадаад худалдааны алдагдал $1.0 тэрбум орчмоор буурна.
Инфляцын түвшин буурахад нөлөөлнө.
Иргэдийн худалдан авах чадвар дээшилнэ.
Газрын тос боловсруулах үйлдвэрийн түүхий тосыг эдийн засгийн хувьд хамгийн үр ашигтайгаар, байгаль орчинд сөрөг нөлөө багатайгаар, аюулгүй тээвэрлэх нөхцөл бүрдэж, олон улсын дэвшилтэт техник, технологийг нутагшуулна хэмээн Уул уурхай, хүнд үйлдвэрийн яамнаас мэдээллээ.