ОХУ-ын Ерөнхийлөгч В.Путин Украины зүүн хэсэгт орших хоёр бүс нутагт энхийг сахиулагчдаа илгээхийг Батлан хамгаалах яаманд тушаасан бөгөөд Украины тусгаар тогтнолыг хүлээн зөвшөөрнө гэж мэдэгдсэнийхээ дараа уг шийдвэрийг гаргасан билээ.
Тэгвэл тухайн бүс нутагт үймээн самуун цаашлаад дайн эхэлж болзошгүй хэмээн сэрэмжилж байгаа учраас тус улсад суугаа монгол иргэд эх орондоо ирэх үү гэдэг нь анхаарал татаад байв. Тэгвэл энэ асуудлаар Гадаад харилцааны яамнаас албан ёсоор мэдээлэл өглөө.
Тус мэдээлэлд
"Өнөөдрийн байдлаар Украин Улсад 22 монгол иргэн байнга оршин сууж байгаа бол 68 монгол оюутан тус улсын их, дээд сургуульд суралцаж байна.
Украин Улсад суралцаж байгаа монгол оюутнуудын 35 нь түр хугацаагаар нутаг буцах шийдвэр гаргаж, эх орондоо ирсэн буюу ирж яваа бол байнга оршин суугаа монгол иргэдээс эх орондоо буцах шийдвэр гаргасан иргэн байхгүй.
Гадаад харилцааны яамны зүгээс Монгол Улсаас Польш Улсад суугаа ЭСЯ болон Украин дахь Өргөмжит консулаараа дамжуулан Украин Улсад оршин суугаа монгол иргэд болон суралцаж байгаа оюутнуудтайгаа тогтмол холбоотой байж, шаардлагатай мэдээлэл, зөвлөгөөг өгч байна.
Украин Улсад оршин суугаа монгол иргэд хэрвээ ЭСЯ-ндаа бүртгүүлээгүй бол [email protected] цахим шуудангаар бүртгүүлэх шаардлагатай бөгөөд туслалцаа, зөвлөгөө хэрэгтэй болсон тохиолдолд ЭСЯ-ны +48 538 286 500 дугаарын шуурхай утсаар холбогдох боломжтой. Мөн түүнчлэн, Украин Улс руу зорчихоор төлөвлөж буй иргэддээ нөхцөл байдлыг харгалзан үзэхийг зөвлөж байна" хэмээлээ.
