Агаарын бохирдлын сэтгэцийн эрүүл мэндэд үзүүлэх нөлөө
Cудалгаагаар агаарын бохирдол нь стресс, тэнэгрэл, Альцгеймер, сэтгэл гутрах эмгэгийн эрсдэлийг нэмэгдүүлдэг болохыг тогтоосон. Мөн агаарын бохирдлын оргил үед богино хугацаанд өртөх нь зарим сэтгэцийн эмгэгтэй хүний нас барах шалтгаан болдог байна. АНУ, Дани улсын иргэдийн дунд хийсэн томоохон судалгаагаар агаарын бохирдолд өртөх нь сэтгэл гутрал, шизофрени, хоёр туйлт эмгэг, бие хүний эмгэгийн эрсдэлтэй холбоотой болохыг тогтоож.
Агаарын бохирдол болон сэтгэцийн эрүүл мэндийн асуудал хоорондын хамаарлыг тогтоосон ч энэ нь сэтгэцийн эрүүл мэндэд хэрхэн, яаж нөлөөлж байгааг хараахан тодорхойлоогүй байна. Хэдий тийм ч агаарын бохирдлын талаар судалдаг судлаач доктор, профессор Clara G. Zundel Дэлхийн эдийн засгийн форумын илтгэлд: “Бохирдсон агаараар амьсгалж буй хүмүүсийн тархины сэтгэл хөдлөлийг хянадаг хэсгүүд өөрчлөгддөг ба үүний үр дүнд тэд цэвэр агаараар амьсгалдаг хүмүүсийг бодвол сэтгэл түгшилт, гутралд өртөх магадлал өндөр байдаг” гэжээ.
Мөн 2023 оны 3-р сард Харвардын их сургуулийн эрдэмтдийн хийсэн судалгаагаар агаарын бохирдол (жижиг тоосонцор (PM2.5), азотын исэл, азотын давхар исэл) нь тэнэгрэлд өртөх эрсдэлийг нэмэгдүүлдэг гэсэн байна.
Сүүлийн үеийн шинэ судалгаануудад агаарын бохирдол нь хүүхдийн тархи болон сэтгэцийн эрүүл мэндэд үзүүлэх нөлөөллийг онцлон судлах болжээ. Тархины хөгжлийн эрчимтэй үедээ байгаа хүүхэд, өсвөр насныханд үзүүлэх нөлөөллийг судлахад агаарын бохирдол нь сэтгэл гутралын шинж тэмдэг, амиа хорлох зан үйлийн эрсдэлтэй холбоотой болохыг нотолсон. Хүний амьдралын эхний жилүүдэд агаарын чанар муу байх нь хоёр туйлт эмгэг, шизофрени, бие хүний эмгэг, сэтгэл гутрал зэрэг сэтгэцийн эмгэгийн эрсдлийг нэмэгдүүлдэг болохыг харуулсаар байна.
Environmental Health Perspectives сэтгүүлд нийтлэгдсэн судалгаагаар агаарын бохирдлын өндөр түвшинд богино хугацаанд өртөх нь хүүхдүүдийн дунд яаралтай тусламжаар сэтгэцийн эмчийн үзлэгт хамрагдах тоог нэмэгдүүлдэг гэжээ.
Medic
Эх сурвалж: APA. Air Pollution’s Impact on Mental Health