Францын нийслэл Парис хотод өчигдөр дэлхийн нэгдүгээр дайн дууссаны 100 жилийн ойн ёслолын үйл ажиллагаа зохион байгуулагдсан. Тэгвэл тус үйл ажилллагаанд оролцохоор явж байсан АНУ-ын Ерөнхийлөгч Доналд Трампын машины цувааг цээж нүцгэн эмэгтэй зогсоохыг оролдсон байна.
Бүсгүй машины цуваа руу хоёр гараа өргөн гүйж очсоныхоо дараа хамгаалалтын албаныханд баривчлагджээ. Энэ явдлын улмаас Ялалтын хаалгыг чиглэсэн төрийн тэргүүнүүдийн машины цуваа түр хугацаанд тасалдахаас өөр аргагүйд хүрсэн аж.
Үүний дараа эсэргүүцлийн хөдөлгөөнүүдээрээ танигдсан “Фемен” эмэгтэйчүүдийн эрхийг хамгаалах байгууллагын төлөөлөгч Инна Шевченко твиттер сүлжээнд “Ялалтын хаалгыг чиглэсэн Доналд Трампын машины цувааг Фемений тэмцэгчид хоёр ч удаа халуун дотноор угтан авлаа” хэмээн жиргэсэн байв. Дэлхийн нэгдүгээр дайн дууссаны 100 жилийн ойн үйл ажиллагааны нээлт Ялалтын хаалганы орчимд зохион байгуулагдсан бөгөөд дэлхийн 70 гаруй орны төрийн тэргүүнүүд оролцжээ.