Эрүүл мэндийн даатгалаар олгодог хөнгөлөлттэй эмийн жагсаалт шинэчлэгджээ. Энэ талаар Эрүүл мэндийн даатгалын ерөнхий газрын Бодлогын хэрэгжилтийг зохицуулах газрын мэргэжилтэн П.Оюунбатаас тодрууллаа.

-Хөнгөлөлттэй эмийн жаг­саалтад  ямар өөрч­лөл­түүд  орсон  бэ?
-Хөнгөлөлттэй эмийн жаг­саалт 2019 оны нэгдүгээр сараас шинэчлэгдсэн. Улсын хэмжээнд хэрэгжээд явж байгаа. Эмийн жагсаалтыг шинэчлэх болсон  шалтгаан нь Эрүүл  мэндийн дааталын цахим системтэй болсон учир үүнийг үндэслэн  судалгаа хийсэн. Судалгаанд монгол хүмүүсийн дунд ямар  өвчин зонхилон тохиолдож байгаа, энэ өвчинд ямар эм түлхүү хэрэглэдэг, тэдгээр эмийн хөнгөлөлтийн  хувь хэмжээ,  хуучин жагсаалтай харьцуул­бал үнийн дүнг нь бууруулах боломжтой эсэхийг тал  бүрээс нь судалж үзсэн юм. Үүнтэй хол­боотойгоор эм ханган  ний­лүү­лэх  байгууллагуудад  ал­бан  бичиг явуулсан. Улмаар 30 гаруй нэрийн эмийн үнийг бууруулах талаар тохиролцож чадсан. Түүнээс гадна Монгол Улсын хэмжээнд зонхилон  тохиолдож буй өвчинд  хам­гийн их хэрэглэдэг 62 нэр төрлийн эмийн хөнгөлөлтийн  хувийг  нэмж өгөөд  байна. 2018 оны зургадугаар  сард  буурсан  байсан  эмийн  нэр төрлөөс,  нэн шаардлагатай гэж үзсэн эмүүдийн  хувийг нэмсэн гэх мэт өөрчлөлтүүд орлоо. Эрүүл  мэндийн даатгалын ерөнхий газраас хөнгөлөлттэй үнийн жагсаалтад орсон  нийт эмийн 90 хувийг байлга гэдэг шаардлага тавьдаг. Гэтэл манай улсад үйл  ажиллагаа явуулдаггүй,  тухайн үйлдвэр­лэгч нь байхгүй болсон эмүүд  жагсаалтад орсон  байсныг,  шаардлагагүй гэж үзэн, хассан.  Ингээд 29 эмийг хасаж, иргэдэд шаардлагатай эмийн  нэр төрлийг  нэмж  өгсөн байгаа. 

-2019 онд хөнгөлөлттэй эмд хэчнээн төгрөг төсөв­лөсөн  бэ?
-Өнгөрсөн онд 29.1 тэрбум төгрөг төсөвлөж байсан бол, 2019 онд 33.4 тэрбум төг­рөг хөн­гөлөлттэй эмд төсөв­лө­сөн. 2018 онд улсын  хэмжээнд Эрүүл мэндийн даатгалын ерөнхий газартай гэрээтэй 800 гаруй эмийн сан байсан. Харин 2019 онд энэ тоог нэмж 1000 орчим болгосон. Өөрөөр хэлбэл  эмийн хөнгөлөлтийн хүртээмж аль  аль талаараа нэмэгдсэн гэж ойлгож болно. Хөнгөлөлттэй эмийн жаг­саалтад 170 ерөн­хий нэрш­лийн нийт 812 худалдааны нэрийн эм багтдаг.

-Зарим иргэд хөнгөлөлт­тэй эмийн хүртээмж муу учир, шаардлагатай эмээ авч чаддаггүй гэж гомдолдог. Үүнд ямар зохицуулалт хийдэг вэ? 
-Даатгуулагч иргэдээ нийг­мийн хариуцлагын үүд­­нээс хөнгөлөлттэй эмийг импор­толж байгаа 10 гаруй эм хангамжийн  бай­гуул­лагад  үнэ буулгах  тухай санал  хүсэлт  явуулсан  бай­гаа. Хөнгөлөлттэй эмийн  жагсаалтад  зайлшгүй шаард­лагатай эмийн  жагсаалтыг  Эрүүл мэндийн  яам гурван жил  тутамд бодлогоороо  баталдаг. Энэ жагсаалтыг үндэслээд хөнгөлөлттэй эмийн жагсаалтыг  гардаг. Иргэд эрүүл мэндийн даатгалаар хөн­гө­лөлт­тэй эм авч чадахгүй бай­гаа нь эмийн сангуудын тө­сөв­тэй холбоотой болов уу. Бага төсөвтэй эмийн сангуудад хөн­гө­лөлт­тэй эм сарын эхэнд дуус­даг бол, ахиу төсөвтэй нь хөн­гө­лөлт­тэй эмийг олгож бай­­гаа гэсэн үг. Гэхдээ Дүүрэг хар­гал­захгүй хөнгөлөлттэй эмийг  худалддаг болсон  учир ир­гэд нэг  эмийн сангийн  төсөв  дууслаа гэхэд,  нөгөө дүүргийн  эмийн  сангаар  үйлчлүүлж бол­но гэсэн үг. Тийм  учраас өм­нөх шиг эмийн сангийн төсөв дууссан, эмээ авч чадахгүй бай­на  гэсэн  асуудал үүсэх нь  багассан.

-Хөнгөлөлттэй эмийн үнийг барих асуудалд  хэрхэн  анхаардаг вэ?
-Манай ерөнхий газраас эмийн  үнийн  дээд хязгаарыг тог­тоож өгдөг. Дээд хяз­гаараас хэтрүүлээгүй л бол, доошоо  хэ­дэн ч төгрөгөөр  зарах нь  ту­хайн  эмийн  сангийн  бод­­логын асуудал. Нэмж мэдээл­э­хэд эрүүл мэндийн даатгал төлж байгаа иргэн бүр эмийн хөн­гө­лөлтөд хамрагдах бүрэн эрхтэй. Эмийн цахим жор бичсэн өдрөөс хойш долоо хоногийн хугацаанд хүчинтэй байдгийг иргэд анхаарах хэрэгтэй.