АНУ-ын Ерөнхийлөгч Доналд Трамп, БНАСАУ-ын төрийн тэргүүн Ким Жон Ун нарын түүхэн уулзалт Сингапурт энэ сарын 12-нд болох билээ. Одоогоор АНУ болон Умард Солонгосын албаныхан Сингапурт хүрч, уулзалтын бэлтгэл ажлыг хангаж байгаа юм.
Гэхдээ өнөөдрийг хүртэл уулзалт Сингапурын яг хаана болох нь тодорхойгүй байсан. Тэгвэл албаныхан уулзалтыг аялал жуулчлалаараа алдартай Сентоса аралд байрлах Капелла зочид буудалд хийхээр тохиролцжээ. Талууд уг зочид буудлыг хоёр улсын төрийн тэргүүний уулзалтыг зохион байгуулахад хамгийн тохиромжтой газар гэж үзсэн байна. Сентоса гэх үг нь өөрөө энх тайван, амар амгалан гэсэн утгатай аж. Тус аралд жилд 20 сая жуулчин очдог гэсэн тоон баримт байдаг юм.