Дэлхийд алдартай Олон улсын “Нарны цирк”-ийн /Cirque du Soleil/ жүжигчин, Монгол Улсын уран нугараач С.Оюун-Эрдэнэ 30 секундийн хугацаанд уран нугаралтын суниалтыг тусгай шалгуурын дагуу хамгийн олон удаа буюу 28 удаа гүйцэтгэснээс 24-ийг нь тооцож,  Гиннесийн дээд амжилтыг шинэчлэн тогтоолоо.

Өмнөх дээд амжилт нь 21 удаа суниасан байдаг юм байна. Жүжигчин С.Оюун-Эрдэнэ зургаан настайгаасаа уран нугаралтаар хичээллэж олон улсын “Нарны цирк”-т 20 гаруй жил ажиллаж байгаа бөгөөд түүнтэй хамт тус циркийн акробатчин Люси (Lucie) гар дээрээ хойшоо хамгийн олон үсэрсэн (back handsprings) үзүүлбэрийг гүйцэтгэж Гиннесийн дээд амжилтыг шинэчилжээ. 

Гиннесийн дээд амжилтын шүүгч Меган Брюс  "Би “Нарны цирк”-ийн /Cirque du Soleil/ жүжигчид сайн гэдгийг мэдэж байсан, гэхдээ эдгээр амжилтыг биечлэн болон ойроос харах нь огт өөр зүйл байсан. Оюун-Эрдэнийн үзүүлсэн уян хатан байдал, дээд биеийн хүч нь намайг гайхшируулсан. Бие бялдрын хувьд маш их ачаалалтай дээд амжилтыг эвдсэн жүжигчиндээ баяр хүргэе" гэжээ.

Уран нугараач С.Оюун-Эрдэнэ “Нарны цирк”-ийн дөрвөн шоунд оролцож байсан бөгөөд Лондон хотын алдарт Рояль Алберт Холл театрт 2024 оны нэгдүгээр сарын 11-ээс гуравдугаар сарын 3-ны өдрүүдэд шинэчилсэн тайзны найруулгатайгаар үзэгчдэд хүрч буй тус циркийн “Alegría – In A New Light” шоунд оролцож байгаа юм.

Авьяас, ур чадвараараа олон улсад танигдаж, Монгол Улсынхаа нэрийг өндөр өргөн Гиннесийн дэлхийн дээд амжилтыг шинэчлэн тогтоосон Уран нугараач С.Оюун-Эрдэнэдээ дахин баяр хүргэж цаашдын уран бүтээлд нь амжилт хүсье.