“Ялгуун” брэндийн маркетингийн менержер Т.Оюунчимэгийг энэ удаагийнхаа “Хөлсний амт” буланд урьж ярилцлаа.

“Ялгуун” брэнд богино хуга­цаанд олонд таниг­даж болж чадлаа. Байгуул­лагын­хаа талаар мэдээлэл өгөхгүй юу?

-Манай компани 2017 онд анх байгуулагдаж байсан түүх­тэй. Бид яагаад түүхийн өв соёлоо орчин үеийн хэрэг­лээнд шингээж, үр хойч­доо өв­лүүлж  болдоггүй юм бэ. Гад­ны жуулчдад өв соё­лоо таниулж болохгүй байна вэ гэ­­сэн зорилгоор анх үүсгэн бай­­гуул­­сан юм. Зах зээлд тор­­гон алчуурыг худалдаанд анх гаргаж байлаа. Түүнээс хойш ули­ралд тутамд буюу ма­най ком­пани 10 гаруй удаа шинэ коллекц гар­сан бай­на. Дахин дав­таг­даш­­гүй кон­тент зур­гуу­дыг гар­гад­гаа­раа бусдаас онц­лог­той. Нэг коллекц дунд­жаар 30 бүтээг­дэхүүнд тавигд­даг. Гэх­­дээ гучуу­лаа өөр өөр зураг­тай байдаг. Манай бүтээг­дэ­хүүнд хэзээ ч дахин давтаг­дахгүй.

-Орчин үеийн хэрэглээнд шингээж үр хойчдоо үлдээх зорилго нь маш богино хугацаанд амжилт авчирсан байна шүү?

-Тийм ээ. Таны хэрэглэж байгаа бүх бүтээгдэхүүн залуу­чуудын хэрэглээнд нийцсэн хэрнээ өв соёл тэр дундаа монгол ахуй болон хатдын хөргөөр дамжуулж, олон нийтэд хүрдгээрээ чухал ач холбогдолтой.

-Эртний хатдын хөрөг, өв соёлтой нийлэхээр өөрийн эрхгүй хүмүүсийн анхаар­лыг татах юм. Танай бүтээг­дэхүү­нээр дамжуулж, Монголыг таних, мэдэх болом­­жийг гад­ны жуулчдад ол­гож бай­гаад бахархал төрдөг шүү?

-Энэ бол ма­най компанийн удирд­лагуудын баримталдаг гол бодлого гэж хэлж болно. Гад­ны жуулчдад Монголд ирээд чанар хэрнээ чамин тансаг бүтээгдэхүүн олдоггүй. Мөн монголчуудтай гадаадад аялах, сурах зэргээр явах үед бусдад бэлэглэх бэлэг маш ховор. Энэ үндэслэлд тулгуурлаж, бүтээгдэхүүн гаргаж болно гэсэн шийдлийг харсан юм.

-Одоогийн байдлаар хэч­нээн нэр төрлийн бүтээг­дэ­хүүн үйлдвэрлэж бай­гаа бол? 

-45 гаруй нэр төрлийн бүтээг­дэхүүнийг үйлдвэрлэж, зах зээлд нийлүүлж байна. Тэр дундаа торгон алчуур нь манай компанийн голлох нэрийн бүтээгдэхүүн. Үнийн хувьд материалын орц зэргээс хамаарч ялгаатай байдаг. Тухайл­бал, жижиг, дунд, том алчуур гэж бий. Өмсдөг хантааз хүртэл байгаа. Мөн хатгамалтай хослол гаргасан. Монгол хээ угалзыг алдар­шуулах чиглэлийн бүтээг­дэхүү­нийг гаргаж байна. Хамгийн сүүлд арьсан цүнхийг худалдаанд гаргалаа. Ээмэг, бөгж, аяга тавагны ком, дэрний уут зэргээр манай бүтээгдэхүүний нэр төрөл нэмэгдсэн.

-Загвар, дизайны санааг хэрхэн гаргадаг вэ. Энэ талаар мэдээлэл өгөхгүй юу?

-Манай гол зургуудыг Лувсан­вандан­гийн арт галерейн хоёр зураач бүтээдэг. Манай бүтээг­дэхүүнд гарсан бүх зураг оюуны өм­чийн бүртгэлтэй. Зураг бү­хэн өөр өөрийн онцлогтой нэр­тэй. Тухайл­бал, торгон аял­гуу зур­гийг цөөхөн нэр төр­лийн бүтээг­дэхүүнд үйлд­вэр­­лэдэг. Өөр бүтээг­дэхүүнд дахиж ашиглахгүй. Тухайн бараа бү­тээг­дэхүүн дахин дав­таг­даш­гүй байхаас гадна хүн бүрийн хэрэглэж байгаа бүтээгдэхүүний зураг өөр, өөр байхыг эрхэмлэдэг. Дахин давтагдашгүй байхыг гол зарчмаа болгодог юм. Тэгж байж бидний үнэ цэн оршдог.

-Судалгааг хэрхэн хийдэг вэ?

-Хэн гэдэг хатан, аль цаг үед амьдарч байснаас бидний судалгаа эхэлдэг. Зургаа улирал­тайгаа нийцүүлж, зураач нарт их өгдөг. Өнгө, чимэглэл, хүрээнд манай дизайнер ажилладаг. Түүний дараагаар эцсийн бүтээг­дэхүүн батлагддаг.

-Монголд загварын чиг хандлага маш хурдан хувьсан өөрчлөгдөж байна шүү дээ. Өнөөдрийн шинэ зүйл хэдхэн хоногийн дараа хуучирсан байх жишээтэй. Загварын судалгааг хэрхэн хийдэг вэ?

-Маш их судалгаа хий­дэг. Нэн тэр­гүүнд бүтээг­дэхүүн бий болохоос эхэлнэ. Олон улсын чиг ханд­­лага болон монгол хүний хэ­рэг­лээ, сэтгэ­хүйн онцлогоос их хамаардаг. Зураа­чид зургаа захиа­лах­даа түүхийн судал­гааг дав­хар танил­цуул­даг байх жишээтэй. Түү­нээс гадна бэлэгд­лийг эрхэмлэдэг.

-Хэчнээн хүний хүч хөдөлмөр, итгэл зүтгэ­лээр “Ялгуун” брэнд хэрэглэгчийн гарт хүрдэг бол?

-Манайх одоогоор 50 орчим хүнтэй үйл ажил­ла­гаа явуулж байна. Анх нээж байхдаа 10 гаруй­хан ажилчинтай үйл ажил­ла­гаагаа эхлүүлж байлаа. Хоёр жилийн хугацаанд хоёр дахин өссөн байна.

-Гадны улсад бүтээгдэхүүнээ гаргаж байгаа юу?

-Хараахан гаргаж амжаагүй. Удахгүй энэ боломж нээгдэх байх.

-Үнийн хувьд баримталдаг бодлого бий юу. Үнийн су­дал­гааг хийхгүйгээр бараа бүтээг­дэхүүнийг зах зээлд нийлүүлнэ гэж байхгүй шүү дээ?

-Монгол хүн бүхэн манай бүтээгдэхүүнийг хэрэглэдэг бай­гаасай гэдэг үүднээс үйлд­вэрийн үнэ дээр НӨАТ-ыг нэмдэг. Тэгэ­хээр манай бүтээгдэхүүн хямд үнэтэйд тоо­цогд­дог. Бараг л үйлдвэрийн үнэ гэж ойлгож болно. Чанар болоод хямд үнийг баримталдаг юм. Бүтээгдэхүүнээ өөрийн нэрийн найман дэлгүүрээр борлуулдаг.

-“Ялгуун” брэндийн ал­чуур торгомсог шүү дээ. Буруу арчилгаанаас  болоод бүтээг­дэхүүний өнгө, зүс тааруухан  болох вий дээ гэсэн бодол хэрэг­лэгч дунд байдаг. Та ямар зөвлөгөөг хэрэглэгч нартаа өгөх вэ?

-Торгон утаслаг, эмзэг  бүтээгдэхүүн шүү дээ. Торгонд зориулсан бүтээгдэхүүнээр угаах ёстой. Сүүлийн үеийн технологи учраас зураг нь арилна гэсэн ойлголт байхгүй. Бүтээгдэхүүнийг угаалгын машинд хийж болохгүй. Гараар угаах ёстой. Бүтээгдэхүүн бүрт арчилгааны зааврыг давхар илгээж байгаа.