“Таван толгой” ХК өнгөрсөн оны цэвэр ашгаасаа хувьцаа эзэмшигчдэдээ ногдол ашиг тараахаар болжээ. Энэ талаар "Таван толгой” ХК-ийн Төлөөлөн удирдах зөвлөлийн 2021 оны дөрөвдүгээр сарын 20-ны өдрийн № 21/03 тоот тогтоолоор 2020 оны цэвэр ашгаас нэгж хувьцаанд 535 /Таван зуун гучин тав/ төгрөг буюу нийт 28.1 тэрбум төгрөгийг хувьцаа эзэмшигчдэдээ ногдол ашиг болгон тараахаар болсон байна. 

Энэхүү ногдол ашгийг авах эрхтэй хувьцаа эзэмшигчдэд 2021 оны дөрөвдүгээр сарын 21-ний өдрөөс эхлэн "ҮЦТХТ" ТӨХХК-аар дамжуулан тараах шийдвэр гарчээ. Түүнчлэн 2021 оны тавдугаар сарын 4-ний өдөр энгийн арилжаагаар 39 хувьцаат компанийн 1,341,748,344 төгрөгийн үнийн дүн бүхий 1,263,612 ширхэг хувьцаа арилжигджээ. Үүнээс 15 хувьцаат компанийн хувьцааны ханш өсөж, 19 хувьцаат компанийн хувьцааны ханш буурсан бол таван үнэт цаасны ханш тогтвортой байв.

"Булган ундрага" ХК (BUN+14.98 хувь) болон "Монгол алт" ХК (ERS +13.10 хувийн)-ийн хувьцааны ханш хамгийн өндөр өсөлттэй байсан бол "Тав" ХК (TAV -11.11 хувийн ) болон "Жуулчин дюти фрий" ХК (SUL -8.00 хувийн)-ийн хувьцаа хамгийн их уналттай гарсан байна.

Мөн “Үндэсний хувьчлалын сан" хамтын хаалттай ХОС-ийн 1,340,146 ширхэг нэгж эрхийг нийт 397,450,391 төгрөгөөр арилжигджээ. ТOP-20 индекс 2.4 хувиар буурч, 36,859.44 нэгжид хүрсэн бол зах зээлийн үнэлгээ 3.7 их наяд төгрөг болсныг Монголын Хөрөнгийн биржээс мэдээлэв.