Монгол Улсын Засгийн газрын мөрийн хөтөлбөр, “Алсын хараа 2050” Монгол Улсын урт хугацааны хөгжлийн бодлогын хүрээнд нийслэлийн Хан-Уул дүүргийн 21 дүгээр хорооны нутаг дэвсгэрт БНСУ-ын хөнгөлөлттэй зээлийн санхүүжилтээр баригдах дэвшилтэт технологийг шингээсэн, ухаалаг систем бүхий орлогод нийцсэн 5002 айл өрхийн амьдрах “Солонго-1” /MON18/, “Солонго-2” /MON19/ орон сууцны хороолол барих төслийн ажилтай өнөөдөр /2024.07.25/ танилцлаа.
Монгол Улсын Хот байгуулалт, барилга, орон сууцжуулалтын яамны сайд Ж.Батсуурь, “Төрийн орон сууцны корпораци” ТӨХХК-ийн Гүйцэтгэх захирал, Төслийн зохицуулагч Б.Эрдэнэбулган, төслийн ерөнхий гүйцэтгэгч “Колон Глобал” корпораци, “Мүүён Си Эм” ХХК-ийн Төлөөний газар, “Интеллект Тауэр” ХХК, “Гранд Слаб Инвест” ХХК болон бусад албаны хүмүүс оролцов.
Монгол Улс, БНСУ-ын Засгийн газар хоорондын хэлэлцээрээр хэрэгжүүлж буй “Солонго-1 (MON-18), Солонго-2 (MON-19) орон сууцны хороолол барих” төсөл хэрэгжүүлэгч нэгжээр “Төрийн орон сууцны корпораци” ТӨХХК ажиллаж байна. “Төрийн орон сууцны корпораци” ТӨХХК Монгол Улсын хүн амыг хямд өртөгтэй, чанартай орон сууцаар хангах төрийн бодлогыг хэрэгжүүлэх, төрөөс зорилтот бүлгийн иргэдийг орон сууцаар хангах бодлогын хүрээнд 2013-2014 онд 1767 айлын “Буянт-Ухаа 1” орон сууцны хороолол, 2014-2016 онд 2592 айлын “Буянт-Ухаа 2” орон сууцны хороолол төслүүдийг амжилттай хэрэгжүүлсэн.
Монгол Улсын Засгийн газрын үйл ажиллагааны хөтөлбөрт хэрэгжүүлэхээр тусгагдсан нийгэм, эдийн засгийн чухал ач холбогдол бүхий 5002 айлын “Солонго 1, 2” орлогод нийцсэн орон сууцны хороолол барих төсөл”-ийн гүйцэтгэгчээр “Колон Глобал” корпораци шалгарч, БХБЯ-тай 2023.08.28-нд гэрээг байгуулан барилга угсралтын ажлыг 2024 оны 03 дугаар сарын 1-ний өдрөөс эхлүүлэн ажлын явц 13.5 хувьтай байна.
Бүгд Найрамдах Солонгос Улсын Засгийн газрын Эдийн засгийн хөгжлийн хамтын ажиллагааны сангийн 266.9 сая ам.долларын хөнгөлөлттэй зээлийн хөрөнгөөр санхүүжүүлэн барилга угсралтын ажил 41 сарын хугацаанд бүрэн барьж дуусган ашиглалтад өгөхөөр ажиллаж байна
Уг төсөл нь Монгол Улсын Засгийн газраас баримталж буй тэргүүлэх зорилтууд болох иргэдийг орлогод нийцсэн орон сууцаар хангах, агаар, орчны бохирдлыг бууруулах, иргэдийг ая тухтай, эрүүл, аюулгүй орчинд амьдрах, агаар, хөрсний бохирдлыг бууруулахад чухал ач холбогдол үзүүлэх төсөл юм.